यमनमा साउदी सेनाको कारबाही : ९ हुथी विद्रोहीको मृत्यु
काठमाडौं, २९ असोज । यमनमा रहेको साउदी अरेबिया नेतृत्वको सेनाले गरेको कारबाहीमा नौ जना हुथी विद्रोहीको मृत्यु भएको छ ।
केही दिनयता साउदी सेनाले हुथी विद्रोहीविरुद्धको कारबाहीलाई निरन्तरता दिइरहेको छ । पछिल्लो कारबाहीमा नौजना हुथी विद्रोही मारिएका साउदी अरेबियाको सेनाले जनाएको छ ।
साउदी अरेबियन सेनाले यमनको मध्यक्षेत्रमा पर्ने मारिब प्रान्तमा हुथीहरुका विरुद्धमा कारबाही गर्दै आएको छ । मारिबमा हुथी विद्रोहीहरुको कार्यालय रहेको स्थानलाई पनि घेरा हालेर आक्रमण गरी ध्वस्त बनाइएको सेनाले जनाएको छ ।
गतहप्ता मात्र साउदी अरेबिया नेतृत्वको सैन्य समूहले गरेको कारबाहीका क्रममा ४० जना भन्दा बढी हुथी मारिएका थिए । मारिब प्रान्तमा पछिल्लो समयमा हुथी विद्रोहीले अखडा जमाउन थालेको सूचनाका आधारमा साउदी अरेबियाको नेतृत्वको सेनाले कारबाही अभियान तीव्र बनाएको छ ।