निरन्तर मुख्यमन्त्री बन्न कुनै सम्झौता गर्न चाहिनँ : अष्टलक्ष्मी शाक्य


४ कार्तिक २०७८, बिहीबार
Asta Laxmi Shakya

हेटौडा, ४ कातिक । बागमती प्रदेशकी मुख्यमन्त्री अष्टलक्ष्मी शाक्यले मुख्यमन्त्री पद जोगाउन कुनै सम्झौता गर्न नचाहेको बताएकी छिन् ।

प्रदेशसभामा विश्वासको मत लिने प्रस्ताव दर्ता गराएकी मुख्यमन्त्री शाक्यले आफूलाई मुख्यमन्त्रीमा निरन्तरता दिन विभिन्न प्रलोभन आए पनि आफूले नैतकिताका आधारमा विश्वासको मत लिने बाटो रोजेको बताएकी हुन् ।

‘प्रदेशमा बहुमत प्राप्त संसदीय दलको नेताको हैसियतमा मुख्यमन्त्री भएपछि दल विभाजनसम्बन्धी अध्यादेशका कारण सरकार अल्पमतमा पर्‍यो’, बिहीबार शाक्यले प्रदेशसभाको रोष्ट्रममा उभिएर भनिन्, ‘त्यसपछि पनि मलाई विभिन्न प्रस्ताव आएका थिए, मुख्यमन्त्रीमा निरन्तरता दिने प्रलोभनसहित । तर, मैले त्यसलाई स्वीकार गरिनँ । नैतिकताका आधारमा विश्वासको मत लिने बाटो रोजेकी छु ।’

उनले गएको असोज २२ गते नै विश्वासको मत लिने प्रस्ताव राखेको भन्दै २४ गते प्रदेशसभामै विश्वासको मत लिने प्रस्ताव पेस गरेको उल्लेख गरिन् । ‘आज विश्वासको मत लिने प्रक्रिया सुरु भएको छ, माननीय ज्यूहरूले विवेकसम्मत रूपमा आफ्ना भनाइ राख्नुहोला’, शाक्यले भनिन्, ‘एमाले र माओवादीको एकतापछि दुईतिहाइ बहुमतमा रहेको सरकार ढलेको छ । अस्थिरताको श्रृंखला फेरि सुरु भएको छ ।’

उनले आफूले केपी शर्मा ओली नेतृत्वको सरकारले ल्याएको दल विभाजनसम्बन्धी अध्यादेशको डटेर विरोध गरेको र अहिले त्योभन्दा निकृष्ट अध्यादेश ल्याएर दल विभाजन भएको भन्दै खेद प्रकट गरिन् ।

शाक्यले आफ्नो कार्यकाल दुई महिना मात्र भए पनि विगत सरकारले गरेको कामलाई आफ्नो सरकारले गरेको भन्दै उपलब्धिका रूपमा सार्वजनिक समेत गरिन् ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७