इटालीबाट आएका विकास मेराग्लियाले च्यासलबाट फुटवल खेल्ने
काठमाडौं, ५ कातिक । नेपाली मसलका इटालियन खेलाडी विकास मेराग्लिया शहीद स्मारक ‘ए’ डिभिजन लिगको क्लब च्यासल युथ क्लबसँग अनुबन्ध भएका छन् । च्यासलले आज (शुक्रबार) विकाससँग एक वर्षका लागि अनुबन्ध गरेको छ । उनले २०७८ को शहीद स्मारक ‘ए’ डिभिजन लिग च्यासलबाट खेल्ने भएका हुन् ।
च्यासल २०७३ सालमा मा ‘ए’ डिभिजन लिगमा उक्लिएको हो । नेपालमै जन्मिएका विकास सन् २००८ मा ६ वर्षको उमेरमा इटाली गएका थिए । उनी १३ वर्षपछि नेपाल फर्किएका हुन् । उनले आफ्नो १३ वर्षदेखि नेपाल आउने सपना पूरा भएको भन्दै खुशी प्रकट गरेका छन् ।
‘१३ वर्षअघि मुटुमा नेपाल लिएर गएको थिएँ । फेरि नेपाल कसरी जान सक्छु भन्ने सोचिरहन्थें । यहाँ आउन पाउँदा स्वतन्त्र भएको महसुस भएको छु’, १९ वर्षीय विकासले भने, म यहाँ विशेष गरी फुटबल खेल्नै आएको हुँ ।’
च्यासल क्लबसँग प्रशिक्षण शुरु गरिसकेका विकासले नेपाली राष्ट्रिय टोलीबाट खेल्नेबारे सोचिनसकेको बताए । तथापी नेपालमा विदेशी नागरिकलाई खेलाउन पाउने प्रावधान छैन । ‘म यो अवसर आयो भने खुशी हुनेछु । यहीं बसेर यो गर्छु त्यो गर्छु भन्ने सोचेको छैन । केही डिसिजन गरेको छैन । यहाँको वातावरण हेरेर निर्णय गर्नेछु’, विकासले सुनाए ।
इटालीमा रहेर व्यावसायिक फुटबल खेलिरहेका विकाशले इटालीको यु–१६ टोलीबाटसमेत खेलिसकेका छन् । युरोपेली फुटबलको प्रतिष्ठित क्लब एटलान्टाको जुनियर टोलीबाट खेलिसकेका विकाशको चर्चा इटालियन युथ फुटबलमा प्रभावशाली खेलाडीका रूपमा हुने गरेको छ । विकाशले इटालीमा रहँदा एटलान्टा र भेनेजियाको युवा टोली तथा काटोलिका र मारिग्लयानेसको सिनियर टोलीबाट खेलिसकेका छन् ।
