‘तिमी सँग’को ट्रेलर रिलिज, साम्राज्ञीसँग आकाश र नाजिरको प्रेम कथा (भिडियोसहित)
काठमाडौं, २६ फागुन । नायिका साम्राज्ञी राज्य लक्ष्मी शाह, आकाश श्रेष्ठ र नाजिर हुसेनको मुख्य भुमिका रहेको फिल्म ‘तिमी सँग’को ट्रेलर रिलिज भएको छ । काठमाडौंमा सोमबार एक कार्यक्रम आयोजना गरि ट्रेलर सार्वजनिक गरेको हो
शिशिर राणाको निर्माण तथा निर्देशनमा तयार भएको चलचित्रमा शिशिर राणा, साकार ओझा, समुन्द्र उप्रेती र सुशिल क्षेत्रीको पटकथा छ । सुशिल उप्रेतीको छायांकन रहेको चलचित्रमा कविराज गहतराज, रामजी लामिछाने र शिशिर खातीको कोरियोग्राफी छ । शिशिर राणाले नै चलचित्रको कथा लेखेका हुन् ।
चलचित्रमा त्रिकोणात्मक प्रेमकथालाई उठान गरेको छ । चलचित्रको ट्रेलरले ३ अपरिचित पात्रको भेट, प्रेम, विछोड, आकर्षणको कथालाई देखाएको छ । विदेशबाट नेपाल आएकी एक यूवती र उनीसँग भेट भएका २ यूवाको रोमान्चक प्रेमकथालाई चलचित्रले प्रस्तुत गरेको ट्रेलरमा देख्न सकिन्छ । चलचित्रमा आकाश रोमान्टिक र गम्भिर भूमिकामा देखिएका छन् भने नाजिर केहि कमेडी स्वभावको देखिएका छन् ।
बारम्बार प्रदर्शन मिति सारिएको चलचित्र ‘तिमी सँग’ चैत्र २३ गतेबाट देशभरका हलमा रिलिज हुँदैछ ।