फाइजर खोप ५–११ वर्षका बालबालिकालाई दिन अमेरिकाको अनुमति
काठमाडौं, १३ कात्तिक । अमेरिकाको फुड एण्ड ड्रग एड्मिनिस्ट्रेसन (एफडीए)ले फाइजर र बायोएनटेकले विकास गरेको कोभिड–१९ विरुद्धको खोप ५ देखि ११ वर्ष उमेर समूहका बालबालिकालाई लगाउन अनुमति दिएको छ ।
अमेरिकामा १२ वर्षभन्दा कम उमेर समूहका बालबालिकाका लागि पहिलोपटक कोरोना खोपलाई अनुमति दिइएको हो । यसअघि एफडीएका विशेषज्ञहरुले यो खोपलाई अनुमति दिन सिफारिस गरेका थिए ।
शुक्रबार फाइजरको खोपले बालबालिकामा लगाउन अनुमति पाएसँगै दुई करोड ८० लाख अमेरिकी बालबालिका यसबाट लाभान्वित हुन सक्ने अन्तर्राष्ट्रिय सञ्चारमाध्यमहरुले बताएका छन् । पाँचदेखि ११ वर्ष उमेर समूहका बालबालिकामा यो खोप ९० प्रतिशत प्रभावकारी देखिएको फाइजरले बताएको छ ।
एफडीएका अधिकारीहरुले बालबालिकालाई पनि खोप लगाउनाले छिटै नै अमेरिका सामान्य अवस्थामा फर्किन सक्ने बताएका छन् । चीन, क्युबा र यूएईले यसअघि नै बालबालिकाको लागि कोरोना खोप लगाउने अनुमति दिइसकेका छन् ।
