खोलाले बगाउँदा एक बालकको मृत्यु, एक बेपत्ता
संखुवासभा, २१ कात्तिक । संखुवासभाको सभापोखरी गाउँपालिका– ६ पात्लेदहस्थित सभाखोलाले बगाउँदा एक बालकको मृत्यु भएको छ । बाढीमा अर्का बालक बेपत्ता भएका छन् ।
मृत्यु हुनेमा स्थानीय भक्तबहादुर बिकका ९ बर्षीय छोरा बिपन बिक रहेको प्रहरीले जनाएको छ । भक्तबहादुरकै घरमा पाहुना आएका सभापोखरी गाउँपालिका– १ का रहिबहादुर बिकका ८ बर्षीय छोरा रैतिन बिक बाढीमा बेपत्ता छन् । शनिबार दिउँसो १ बजतिर नुहाउने क्रममा उनीहरुलाई खोलाले बगाएको प्रहरीले जानकारी दिएको छ ।
घटनाको जानकारी पाए लगतै प्रहरी चौकी बाह्रबिसेबाट खटिएको टोलीले बगाएको स्थानबाट करिव ५ सय मिटर तल बिपिनको शव फेला पारेको थियो । बाढीमा बेपत्ता बालकको खोजतलास भइरहेको जिल्ला प्रहरी कार्यालय संखुवासभाले जनाएको छ ।