रोल्पामा जीप दुर्घटना हुँदा तीन जनाको मृत्यु
रोल्पा, २८ कात्तिक । रोल्पामा जीप दुर्घटना हुँदा आज (आइतबार) तीन यात्रुको ज्यान गएको छ । तीन जना घाइते छन् । प्रहरीका अनुसार बिहान ११ बजेतिर घर्तीगाउँ नजिकैको सडकबाट जीप करिब ३ सय मिटरमुनि खसेको थियो ।
माडी गाउँपालिका–६ हान्निङदेखि गाउँपालिकाको केन्द्र घर्तीगाउँतिर जाँदै गरेको रा १ ज ३८२ नम्बरको जिप सडकमुनि खसेको रोल्पाका प्रहरी प्रमुख प्रहरी नायब उपरीक्षक नरेशराज सुवेदीले बताए । उनका अनुसार मृत्यु हुनेहरुमा दुई जना पुरुष र एक जना महिला छन् ।
उनीहरुको सनाखत हुन बाँकी छ । घाइतेको स्थानीय स्वास्थ्य संस्थामा उपचार भइरहेको छ । घटनाबारे थप अनुसन्धान भइरहेको प्रनाउ सुवेदीले बताए । उक्त क्षेत्रमा केही महिनाअघि एम्बुलेन्स दुर्घटना भएको थियो । उक्त घटनामा चालकको मृत्यु भएको थियो ।
