प्रदेश १ : प्रदेशसभा बैठक रोक्ने एमालेको प्रस्ताव सत्तारुढ दलहरुले मानेनन्
मोरङ, ३० कात्तिक । बन्दका कारण आफ्ना सांसद आउन नसकेको भन्दै नेकपा (एमाले) ले प्रदेश–१ को आजको बैठक स्थगन गर्न माग गरेको छ ।
एमाले प्रमुख सचेतक बुद्धिकुमार राजभण्डारीले बन्दका कारण विराटनगर बाहिर रहेका धेरै सांसदहरू आइपुग्न नसेकेकाले सदन स्थगन गर्न माग गरिएको बताए । मुख्यमन्त्री राजेन्द्रकुमार राईले आजको बैठकमा विश्वासको मत लिने कार्यसूची छ । एमालेले भने मतदान प्रक्रिया थालिए बैठकमा सहभागी नहुने बताएको छ ।
पाँच गठबन्धन दलका तर्फबाट मुख्यमन्त्री बनेका राईले आजको बैठकमा विश्वास मत लिने प्रदेशसभा सचिवालयमा प्रस्ताव दर्ता गराएका थिए । कार्य व्यवस्थाको बैठकमा एमालेले सदन स्थगन गर्न माग गरेको हो । सत्तारुढ दलले भने वैठक रोक्ने एमालेको प्रस्ताव अस्वीकार गरेको छ ।