हैंजा फैलिएको डेढ महिनापछि आजदेखि कपिलवस्तुमा खोप अभियान


५ मंसिर २०७८, आईतवार

कपिलवस्तु, ५ मंसिर । कपिलबस्तुमा हैजा फैलिएको डेढ महिनापछि बल्ल हैजाविरुद्धको खोप सुरु गरिएको छ । हैजाविरुद्धको खोप मंसिर ५ अर्थात् आजदेखि १५ गतेसम्म खोप अभियान सञ्चालन हुने स्वास्थ्य तथा जनसंख्या मन्त्रालयले जनाएको छ ।

यो खोप दुई चरणको हुने जनाइएको छ । मन्त्रालयका अनुसार पहिलो मात्रा लिएको १५ दिनपछि दोस्रो मात्रा सुरु गरिनेछ । यो खोप अभियान कपिलवस्तु जिल्लाको हैजा प्रकोप देखिएको ५ वटा स्थानीय तहमा सुरु गरिएको स्वास्थ्य मन्त्रालयको भनाइ छ । कपिलबस्तुका कृष्णनगर, यशोधरा, महाराजगञ्ज र विजयनगरका सबै वडाका खोप केन्द्रमा निःशुल्क रुपमा खोप उपलब्ध हुनेछ । यो खोप एक वर्ष माथिका सबै उमेर समूहका नागरिकलाई दिइनेछ ।

हैजाविरुद्धको खोप एक वर्ष मुनिका बालबालिका, पखाला लागेका र ज्वरो आएका व्यक्तिले लिन नहुने विज्ञको भनाइ छ । हैजाविरुद्धको खोप पहिलो मात्रा लिएपछि कुनै प्रतिक्रिया देखिएमा दोस्रो मात्रा खोप लिन नहुने स्वास्थ्य मन्त्रालयले जनाएको छ ।

हैजाको खोप लिएपछि कसै कसैलाई हल्का ज्वरो आउने, पेट दुख्ने, वाकवाकी वा पखाला लाग्ने, चिलाउने, साना बिमिरा, खटिरा आउने जस्ता सामान्य असर देखिन सक्ने विज्ञको भनाइ छ । यस्ता लक्षण विस्तारै ठिक भएर जाने स्वास्थ्य तथा जनसंख्या मन्त्रालयले जनाएको छ ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु सिवा
  • सूचना विभाग दर्ता नं.
  • १८०२/२०७६-७७