एमालेले फेरि देशको नेतृत्व गर्नुछ, चितवनबाट नयाँ उत्साह लिएर फर्किन्छौं : हरिबहादुर राई
काठमाडौं, १० मंसिर : राजनीतिक हिसाबले हरिबहादुर राई नेकपा (एमाले)का नेता हुन् । तर उनको गृह जिल्ला भोजपुरमा सबै पार्टीका साझा नेता जस्तै छन् । सबै पार्टीका नेता तथा कार्यकर्ताले भन्ने गरेका छन्, ‘हरि जेठा, हाम्रो साझा नेता ।’ एमाले केन्द्रीय कमिटी सदस्य राईलाई सबैले मान्नुको कारण हो, उनको इमानदारिता र निष्ठा । उही भोजपुरे भाषामा उनलाई भन्ने गरिन्छ, ‘इमानी नेता ।’
पछिल्लो समयमा भोजपुर मन्त्री, सांसद जन्माउने जिल्लाको रुपमा परिचित छ । तर निरन्तर पार्टी र आन्दोलनमा सक्रिय भएर पनि आजसम्म यस प्रकारका कुनै जिम्मेवारी नपाएका नेता हुन् उनी । राई २०३९ सालबाट राजनीतिमा निरन्तर सक्रिय छन् । उनले २०४० सालमा अनेरास्ववियु एकता पाँचौंको सदस्यता लिएका थिए । उनी २०४२ मा अनेरास्ववियु प्रारम्भिक कमिटी, २०४७ माघमा नेकपा एमाले गाउँ कमिटीको उपसचिव भए ।
२०४९ सालमा एमाले जिल्ला कमिटी सदस्य बनेका राई २०५४ मा जिविस भोजपुरको सदस्य निर्वाचित भए । २०६५–२०६८ मा एमाले भोजपुरको उपसचिव भएका उनी १४ वर्षसम्म युवा संघको केन्द्रीय नेतृत्वमा रहे । २०६६ सालमा युवा संघको लहान महाधिवेशनबाट केन्द्रीय उपाध्यक्ष बनेका राई युवा संघको सातौं महाधिवेशनबाट केन्द्रीय सल्लाहकार सभापति बनेका थिए । राई एमालेको नवौं महाधिवेशनबाट केन्द्रीय कमिटीमा निर्वाचत भए । हाल उनी एमाले केन्द्रीय सदस्य छन् ।
युवा संघमा रहदा पनि उनी साझा अभिभावक जस्तै थिए । अहिले पनि देशभरीका युवाहरुले उनलाई सम्मानका साथ हेर्ने गरेका छन् । नवौं महाधिवेशनबाट केन्द्रीय सदस्यमा निर्वाचित राई दशौं महाधिवेशनमा पनि केन्द्रीय सदस्यका उम्मेवार छन् ।
चितवनमा मंसिर १० देखि १२ गतेसम्म हुन लागेको एमाले १० औं महाधिवेशनका एकताको महाधिवेशन हुने उनको दाबी छ । नेकपा (एमाले)ले यसबिचमा अनेक हन्डर ठक्कर खाएर चितवनको महाधिवेशनसम्म पुगेको उल्लेख गर्दै उनले भने, ‘नेकपा (एमाले)ले फेरि देशको नेतृत्व गर्नु पर्नेछ । एमालेकै नेतृत्वमा देश निर्माण गर्नुपर्नेछ । यही मुल लक्ष्यलाई मध्यनजर गर्दै हामी चितवनबाट नयाँ एकताको सन्देश प्रवाह गर्नेछौं ।’
नेतृत्व चयनमा सर्बसम्मत भए नेता र निर्वाचन भए कार्यकर्ताहरुले विवेक प्रयोग गर्ने उनको दाबी छ । भन्छन्, ‘हाम्रो सामुन्नेमा तीन निर्वाचनहरु छन्, त्यसको लागि नयाँ उचाईमा पार्टीलाई एकताबद्ध बनाउनुको अर्को छैन । यो काम मुल नेतृत्व र प्रतिनिधिहरुले गर्नुहुनेछ ।’
उनले कम्युनिष्ट आन्दोलनलाई राजनीतिक, वैचारिक र सांगठानिक रूपमा सबल र सक्षम बनाउन आफ्नो उम्मेदवारी भएको बताए । राईले भने, ‘मेरो जिन्दगी नै पार्टी निर्माण र समाज परिवर्तनमा समर्पित गरेको छु । विद्यार्थी, युवा हुँदै अहिले पार्टी केन्द्रीय कमिटीमा पनि छु । संकटको अवस्थाबाट एमालेलाई जनताको बीचमा थप स्थापित गर्नका लागि यी अनुभवहरुले काम गर्नेछ ।’ राईसँगको कुराकानी :-
