न्याय माग्दै न्यायालय पुगेका मान्छे पुर्पुरोमा हात राखेर फर्किए : प्रम ओली
काठमाडौं: प्रधानमन्त्री केपी शर्मा ओलीले प्रधानान्यायाधीस गोपाल पराजुलीको जन्म मिति विषयमा भएको विवाद बारे बोलेका छन् ।
बुधवार प्रधानमन्त्री कार्यालय बालुवाटारमा आयोजना भएको कार्यक्रममा बोल्दे नेकपा एमालेका अध्यक्ष समेत रहेका ओलीले सर्वोच्चमा देखिएको विवादले न्यायका लागि गएका मान्छे अन्यायमा परेको बताएका छन् । उनले भने, ‘अब के बोल्नु, के नबोल्नु ? बोलेर के हुने, नबोलेर के हुने ? बेञ्च बसेको छैन । न्याय पाउँ भनेर गएका मान्छे तमासा हेरेर पुर्पुरोमा हात लगाएर फर्किराखेका छन् ।’
प्रम ओलीले सर्वोच्च अदालको हालत खराब भएको बताएका छन् । कसैले न्यायालयको बारेमा प्रधानमन्त्रीले नबोलिदिए हुन्थ्यो भन्ने लागेको पनि बताए । उनले भने, ‘सर्वोच्च अदालतमा हेर्नुस् त, प्रधानन्यायाधीश र प्रधानन्यायाधीशको रोलक्रममा भएकाहरुको अवस्था । यो विषयमा प्रधानमन्त्री एउटा नबालेर के हुन्छ र ? त्यहाँ न्यायालय भकभक उम्लिराख्या छ ।’
