मनकामना केबुलकार चार दिन बन्द रहने
काठमाडौं । मनकामना केबुलकारको स्तरोन्नतिका लागि आइतबारदेखि चार दिनसम्म केबुलकार सेवा बन्द गर्ने भएको छ ।
जसअनुसार केबुलकारको सेवा आउँदो पुस ४ गतेदेखि ७ गतेसम्मका लागि बन्द रहनेछ । मर्मतसंभार सकिएपछि पुस ८ गते बिहीबारबाट केबुलकार सेवा नियमित सुरुवात गर्ने कम्पनीले जनाएको छ ।
उक्त अवधिभर केवलकार बटमस्टेशन र रेष्टुरेण्ट सेवा भने यथावत रहनेछ । कम्पनीले केबुलकारमा प्रयोग हुँदै आएको एनालग कनेक्ट प्रणालीलाई डिजिटल प्रणालीमा स्तरोन्नति गर्न लागेको हो । लामो समयदेखि जडान गरिएको प्रविधि र उपकरणमा प्रयोग भएका स्पेयर पार्ट्सहरु पाउनै मुस्किल हुँदै गएपछि यसलाई स्तरोन्नति गर्न लागिएको मनकामना केबुलकार कम्पनीले जनाएको छ ।
केबलकारको लठ्ठा, ग्रिप लगायतका उपकरण पनि स्तरोन्नति गर्ने जनाइएको छ । चालु आर्थिक वर्षबाटै केवलकारलाई नयाँ प्रविधिमा लैजाने योजना रहेको कम्पनीको भनाइ छ । कम्पनीका अनुसार केवलकारको भवन, टावर, गोन्डोला, बुलह्वील लगायत उपकरण भने साबिककै रहनेछ । यो सबै स्तरोन्नति सम्पन्न भएसँगै मनकामना केवलकार मुलुककै पहिलो डिजिटल कनेक्ट सिस्टमसहितको हुनेछ ।
