बालिका हत्या आरोपमा दम्पति पक्राउ
मोरङ । एक २१ महिने बालिका हत्या आरोपमा दम्पति पक्राउ परेका छन् । मोरङको रंगेली नगरपालिका-२ नहर टोलका चन्द्र उरावकी २१ महिने छोरी युनिसा उरावको हत्या आरोपमा सोही ठाउँका नातामा फुपू-फुपाजु पर्ने ३५ वर्षीया संगीता उराव र ४६ वर्षीय सैनी उराव पक्राउ परेका हुन् ।
२६ मंसिरमा घरबाट हराएकी बालिकाको शव २८ मंसिरमा आफ्नै घर पछाडि पैनीमा गाडेको अवस्थामा फेला परेको थियो । हराएपछि मृत फेला परेकी बालिका दुई दिनसम्म उराव दम्पत्तिसँगै रहेको र अन्त कतै नगएको पाइएकाले उराव दम्पतीलाई अनुसन्धानका लागि ४ पुसमा मोरङ प्रहरीले पक्राउ गरेको थियो ।
नातेदार बालिकाको हत्या गर्ने कारण भने अझै खुलिनसकेको मोरङ प्रहरी प्रवक्ता डिएसपी दिपक श्रेष्ठले बताएका छन् । उराव दम्पतिलाई कर्तव्य ज्यान कसुरमा अदालतमा मुद्दा दर्ता गराएर इलाका प्रहरी रंगेलीले अनुसन्धान गरिरहेको छ ।
