माओवादी केन्द्रको राष्ट्रिय सम्मेलन : पाहुना नबोलाइने, शक्ति प्रदर्शन नगरिने


६ पुष २०७८, मंगलवार
perish dada party

काठमाडौं । सत्तारुढ नेकपा (माओवादी केन्द्र) ले आफ्नो आसन्न राष्ट्रिय सम्मेलनमा शक्ति प्रदर्शन नगर्ने भएको छ । यही पुस ११-१३ गतेसम्म काठमाडौंको प्रज्ञा भवनमा हुने सम्मेलनमा अरू दलका नेताहरूलाई निम्तो पनि नदिइने स्थायी कमिटी सदस्य गिरिराजमणि पोखरेलले जानकारी दिएका छन् । पार्टीको महाधिवेशन नभएकाले अरू दलका नेता र विदेशी पाहुनालाई निमन्त्रणना नगरिने उनको भनाइ छ ।

‘अन्य दलका नेता र विदेशी पाहुनालाई महाधिवेशनमा बोलाइन्छ । यो सम्मेलन भएकाले आन्तरिक हुन्छ । अरू दललाई बोलाउने कार्यक्रम छैन’, उनले भने । अध्यक्ष पुष्पकमल दाहाल ‘प्रचण्ड’ ले उद्घाटन गर्ने सम्मेलनमा करिब १५ सय जना सहभागी हुनेछन् । ‘सम्मेलनमा लगभग १५ सय जनाको सहभागिता हुन्छ । अध्यक्षले उद्घाटन गर्नुहुन्छ’, पोखरेलले भने ।

पुस ११ गते सम्मेलनको उद्घाटन गरिनेछ । १२ गतेदेखि बन्द सत्रको कार्यक्रम सुरु हुने केन्द्रीय कार्यालयका सचिव श्रीराम ढकालले जानकारी दिए । बन्दसत्रमा राजनीतिक, समसमायिक, विधानलगायत दस्तावेज प्रस्तुत हुनेछन् । ‘११ गते उद्घाटनसत्र हुन्छ । १२ गतेबाट बन्दसत्र सुरु हुन्छ । बन्दसत्रमा दस्तावेज पेस हुन्छन् । दस्तावेजमाथि छलफल हुन्छ’, ढकालले सुनाए, ‘छलफलको निष्कर्ष आवश्यक सुझावसहित पेस हुन्छ । उठेका विषयमा अध्यक्षले जवाफ दिनुहुन्छ । सुझावसहित प्रस्ताव पारित हुन्छ ।’

दस्तावेज पारित गरेपछि नयाँ नेतृत्व चयनको प्रक्रिया प्रारम्भ हुनेछ । हालको विधान संशोधन नभए २९९ सदस्यीय केन्द्रीय कमिटी बन्नेछ । विधान संशोधन गरेर ११-१५ जनासम्मको पदाधिकारी बनाउने तयारी पनि गरिएको छ । राष्ट्रिय सम्मेलनको केही समयपछि अर्को कार्यक्रममार्फत शक्ति प्रदर्शन गरिने नेताहरू बताउँछन् । शक्ति प्रदर्शन नगरी राष्ट्रिय सम्मेलन गर्न लागिएको ढकालले बताए । राष्ट्रिय सम्मेलनबारे जानकारी गराउन भोलि पत्रकार सम्मेलन आयोजना गर्ने तयारी छ ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७