ब्राजिलका ११६ शहर डुबान, संकटकाल घोषणा
काठमाडौं । ब्राजिलको उत्तर-पूर्वी बाहिया प्रान्त र वरिपरिका ११६ शहरहरु डुबानमा परेका छन् । सो प्रान्तमा बाँध भत्किएको तीन दिन वितिसक्दा पनि करिब ११६ शहरहरु अझै डुबानमा परेका हुन् ।
नोभेम्बर अन्तिमदेखिको निरन्तर वर्षापछि बाहिया प्रान्तमा केही दिनअघि दुईवटा बाँध भत्किएका थिए । सो बाँध भत्किएपछि र वर्षासँगै आएको बाढीपछि सो क्षेत्रमा मंगलबारसम्म २१ मानिसले ज्यान गुमाएका थिए भने करिब ३५८ मानिस घाइते बनेका थिए । बुधबारसम्म करिब ११६ शहरका करिब ४ लाख ७० हजार मानिस प्रभावित भएको अन्तर्राष्ट्रिय मिडियामा खबर छ ।
सो बाढी र डुबानपछि प्रान्तीय सरकारले केही दिनसम्मको लागि संकटकाल घोषणा गरेको छ । सरकारी रिपोर्टअनुसार हालसम्म करिब ३५ हजार मानिस घरबारविहीन बनेका छन् भने ४३ हजार मानिस विस्थापित बनेका छन् ।
