प्रधानमन्त्री कप क्रिकेट : आज चार खेल हुँदै
काठमाडौं । प्रधानमन्त्री कप टी-२० क्रिकेटमा आज (शुक्रबार) चार खेल हुँदैछन् । यीमध्ये दुई खेल त्रिवि क्रिकेट मैदान र दुई खेल मूलपानी क्रिकेट मैदानमा हुनेछन् ।
पहिलो खेलमा त्रिवि क्रिकेट मैदानमा कर्णाली प्रदेश र नेपाल पुलिस क्लबबीच प्रतिस्पर्धा हुनेछ । पुलिसले खेलेको दुवै खेलमा जित हात पार्दै ४ अंक जोडेको छ भने कर्णालीले तीनमध्ये एक खेलमा मात्र जित हात पार्दै २ अंक जोडेको छ ।
मूलपानीमा क्रिकेट मैदानमा हुने पहिलो खेलमा त्रिभुवन आर्मी क्लब र सुदूरपश्चिम प्रदेशबीच प्रतिस्पर्धा हुनेछ । आर्मीले ३ खेलबाट १ जित, १ हार र १ खेल अनिर्णित भएपछि ३ अंक हात पारेको छ भने सुदूरपश्चिमले २ मध्ये १ खेलमा जित हात पार्दै २ अंक जोडेको छ ।
त्यस्तै त्रिवि मैदानमा हुने दोस्रो खेलमा प्रदेश २ र बागमती प्रदेशबीच प्रतिस्पर्धा हुनेछ । बागमतीले २ मध्ये १ मा जित निकाल्दै २ अंक जोडेको छ । प्रदेश २ ले भने ३ खेलबाट २ अंक हात पारेको छ । मूलपानीमा हुने दोस्रो खेलमा एपीएफ र लुम्बिनी प्रदेशबीच प्रतिस्पर्धा हुनेछ । एपीएफले ३ खेलमा अपराजित रहँदै ६ अंक जोडेको छ भने लुम्बिनीले २ खेलबाट २ अंक जोडेको छ ।
