निजी र ट्याक्सी बाहेकका सवारीमा जोर-बिजोर हटाउन सिफारिस
माघभर विद्यालय नखुलाउन सिफारिस
काठमाडौं । कोभिड संकट व्यवस्थापन समन्वय केन्द्र (सीसीएमसीसी) ले ट्याक्सी र निजी बाहेकका सार्वजनिक सवारी साधनबाट जोर-बिजोर प्रणाली हटाउन सिफारिस गरेको छ ।
सीसीएमसीसीले मन्त्रिपरिषद् बैठकबाट निणर्य गरेर सार्वजनिक सवारीको जोर बिजोर प्रणाली हटाउन सिफारिस गरेको हो । सार्वजनिक सवारीमा भिड बढ्दा झनै जोखिम पनि बढेकाले जोर बिजोर प्रणाली हटाउने निणर्य भएको सीसीएमसीसीले जनाएको छ ।
यस्तै सीसीएमसीले विद्यालयमा भौतिक उपस्थितिमा हुने पठनपाठकमा रोक लगाउने निणर्य माघ मसान्तसम्म कायमै राख्न सरकारलाई सिफारिस गरेको छ ।
सीसीएमसीको शुक्रबार बसेको बैठकले यस्तो सिफारिस गरेको हो । बैठकले विश्वविद्यालयले सञ्चालन गर्ने परीक्षा भने स्वास्थ्य मापदण्ड अपनाएर गर्न अनुमति दिन सिफारिस गरेको छ । सीसीएमसीकी प्रवक्ता सुनिता नेपालले भ्याक्सिनेसन (खोप अभियान) का लागि विद्यालय खोले पनि पठनपाठनका लागि भने माघ मसान्तसम्म नखोल्न सिफारिस गरिएको जानकारी दिइन् ।
‘माघ मसान्तसम्मका सिफारिस गरेका छौँ । क्याबिनेटबाट के निणर्य हुन्छ ?’ उनले भनिन्, ‘हामीले चाहिँ सबैले खोल नलगाइसकेको अवस्थाले गर्दा माघ मसान्तसम्म भ्याक्सिनेसनका लागि खोल्ने र वैकल्पिक माध्यमबाट नै कक्षाहरू सञ्चालन गर्न सिफारिस गरेका छौँ ।’
