पाँच वर्ष दुःख सहनुस्, काठमाडौंमा रेल गुड्छ : मन्त्री महासेठ
काठमाडौं, ४ चैत : भौतिक योजना तथा यातायातमन्त्री रघुवीर महासेठले काठमाडौंबासीको यातायात असुविधा पाँच वर्षभित्रमा सकिने दावी गरेका छन् ।
उनले अब पाँच वर्ष दुःख झेले त्यसपछि काठमाडौंबासीले रेलको यात्रा गर्न पाउने दावी गरे । उनले पाँच वर्षभित्र काठमाडौंमा रेल गुडाउन आफूले कुनै कसर बाँकी नराख्ने बताएका छन् । आइतबार रिपोर्टस क्लब नेपालले गरेको साक्षात्कार कार्यक्रममा मन्त्री महासेठले भने, ‘‘सिङ्गापुर, मलेसिया र साइप्रस विकास हुन सक्छ भने नेपाल किन सक्दैन ? इच्छाशक्ति भएपछि सबै सकिन्छ । पाँच वर्ष्भित्र उपत्यकामा रेल गुड्छ ढुक्क हुनुस् ।’
अहिलेको सरकारलाई काम नगर्नका लागि कुनै पनि बहाना नभएकाले पाँच वर्ष्भित्रमा लक्षित योजनाहरु सम्पन्न गरेरै छाड्ने बताए । आर्थिक समृद्धि र भौतिक पूर्वाधार विकासका लागि प्रधानमन्त्री केपी शर्मा ओली प्रतिवद्ध रहेको उल्लेख गर्दै उनले एकै वर्षमा चमत्कार गर्न नसकिएपनि पाँच वर्षभित्रमा चमत्कार गरेर देखाउने दाबी गरे । महासेठले केहीदिनभित्र नै काठमाडौँ महानगरपालिका, ललितपुर महानगरपालिका, भक्तपुर उप–महानगरपालिका, सडक विभाग, रेल विभाग, यातायात व्यवस्था विभाग र ट्राफिक प्रहरी महाशाखाबीच विशेष छलफल गरेर काठमाडौँ उपत्यकाको सडक र सवारी व्यवस्थापनका लागि योजना बनाइने स्पष्ट पारे । ‘थाई एयरवेज र नेपाल वायुसेवा निगम एउटै वर्ष स्थापना भएको हो । थाइ एयरवेज आज कहाँ पुगिसक्यो, नेपाल वायुसेवा निगम कहाँ छ ? इच्छाशक्तिका कारण हो’, मन्त्री महासेठले भने ।
विगतमा काम भएन भनेर अहिलेको सरकारलाई तुलना नगर्न उनले आग्रह गरे । मन्त्रीसेठले २० वर्ष पूराना सवारी साधन हटाउने विषयमा आफूले पुनर्विचार गर्ने समेत बताए । ‘२० वर्ष पूराना गाडी हटाउने निर्णयका विषयमा हामी गम्भीर छौँ । चाँडै नै नयाँ नीति बनाउँछौँ’, उनले भने । यद्यपी पूराना गाडी कुनै न कुनै दिन हटाउनै पर्नेउनको तर्क छ ।
