बेइजिङमा भारी हिमपात र वर्षा, शीतकालीन ओलम्पिकका पाहुना प्रभावित
काठमाडौं । चीनको बेइजिङमा शीतकालीन ओलम्पिक चलिरहेको समयमा हिमपात र वर्षा भएको छ । हिमपातका कारण केही ठाउँमा गाडी चल्न सकेका छैनन् भने बाक्लो हिउँ जम्दा जनजीवन प्रभावित भएको छ ।
भारी हिमपात भएपछि शीतकालीन ओलम्पिकका केही खेल समेत स्थगित गरिएको चिनियाँ सञ्चारमाध्यमले जनाएका छन् । स्थानीय अधिकारीकाअनुसार विशेष गरी सन् २०२२ को बेइजिङ शीतकालीन ओलम्पिकका लागि पुगेका पाहुना तथा आयोजकको सहजीकरणका लागि सहरमा जमेका हिउँ सफा गर्ने काम सुरु गरिएको छ ।
हिमपातले ओलम्पिकमा सहभागी हुन पुगेका खेलाडी र पाहुना प्रभावित भएका छन् । त्यहाँको मौसम विज्ञान पूर्वानुमान शाखाले बेइजिङसहित शान्सी, हेबइ, तियान्जिन, शिजियाङलगायत क्षेत्रमा भारी हिमपात भइरहेको जनाएको छ ।