फान अवार्डमा छक्का पञ्जा सबैभन्दा धेरै, ‘जात्रा’ र ‘लुट–२’ १२–१२ विधाको मनोनयनमा
काठमाडौ, ८ चैत । दोस्रो फान अवार्ड २०७३ को मनोनयन सार्वजनिक गरिएको छ । नेपाल चलचित्र कलाकार संघको आयोजनामा हुन लागेको अवार्डको बुधबार काठमाडौंमा कार्यक्रम आयोजना गरी २४ विधाका उत्कृष्ट पाँचको मनोनयन सार्वजनिक गरिएको हो ।
२०७३ सालमा रिलिज भएका चलचित्रमध्ये ‘छक्का पञ्जा’ २० वटा विधामा मनोनयनमा परेको छ । प्रदीप भट्टराईको डेब्यु निर्देशन रहेको ‘जात्रा’ र निश्चल बस्नेत निर्दे्शित ‘लुट २’ १२ विधामा मनोनयनमा परेका छन् ।
छक्का पञ्जाको कथा, पटकथा, संवाद, द्वन्द्व, सम्पादन, छायांकन, नवनिर्देशन, चरित्र अभिनेत्री, सह(अभिनेता (दुई), सह(अभिनेत्री, खलपात्र, हास्य कलाकार (दुई), अभिनेता, अभिनेत्री, चलचित्र, गीतकार, गायक, गायिका, संगीतकार र नृत्य निर्देशक विधाको मनोनयनमा परेको हो ।
हेमराज बिसी निर्दे्शित ‘गाजलु’ ९ विधामा मनोनयनमा परेको छ भने आकाश अधिकारी निर्दे्शित ‘के म तिम्रो होइन र’ ८ विधामा मनोनयनमा परेको छ ।
त्यस्तै, रामबाबु गुरुङ निर्दे्शित ‘पुरानो डुंगा’ ७, यस्तै नरेशकुमार केसी निर्दे्शित ‘डाइङ क्यान्डल’ ६ विधाको मनोनयनमा परेको छ ।
कार्यक्रममा वरिष्ठ चलचित्रकर्मी नीर शाहले यस्ता अवार्डले नेपाली कलाकारको क्षमता वृद्धिमा सहयोग पुग्ने बताए ।
संघका अध्यक्ष रामकेशर बोगटीले गत वर्षजस्तै आगामी १६ गते काठमाडौंको आर्मी अफिसर्स क्लबमा अवार्डलाई वितरण गरिने बताए ।