पिकअपले ठक्कर दिंदा दुईको मृत्यु, दुई प्रहरी घाइते
रौतहट । रौतहटमा बुधबार राति गाडीको ठक्करबाट दुई जनाको मृत्यु भएको छ भने दुई जना घाइते भएका छन् ।
चन्द्रनिगाहपुरबाट गरुडातर्फ जाँदै गरेको बा १७ च ६१६३ नम्बरको महेन्द्र पिकअपको ठक्करबाट बृन्दाबनका ३७ वर्षीय जीतेन्द्र पटेल र २७ वर्षीय हरि कुमार ठाकुरको मृत्यु भएको हो ।
गाडीको ठक्करबाट प्रहरी चौकी हरषामा कार्यरत प्रहरी सहायक निरीक्षक उपेन्द्र प्रसाद यादब र प्रहरी जवान मुर्तुजा अन्सारी घाइते भएका छन् ।
सो गाडी अनियन्त्रित भई सोही स्थानको पान पसल र मोटरसाइकलमा समेत ठक्कर दिएको प्रहरीले जनाएको छ । इलाका प्रहरी कार्यालय गरुडाका प्रहरी नायब उपरीक्षक श्रीराम भण्डारीले ठक्कर दिने पीकअप गाडी नियन्त्रणमा लिएको बताए ।
