कांग्रेसको गढ र घरमा एमाले जन्मेको छ : महासचिव पोखरेल
‘जवानीमा कांग्रेस भएकाहरु पनि उमेर ढल्केपछि एमाले हुन्छन्’
नेपालगञ्ज । प्रमसख प्रतिपक्षी नेकपा (एमाले) का महासचिव शंकर पोखरेलले कांग्रेसको गढ र घरमा एमाले जन्मेको बताएका छन् । एमालेका युवा, विद्यार्थी र महिलाको निर्वाचन परिचालनसम्बन्धी संयुक्त भेलालाई शनिबार नेपालगञ्जमा सम्बोधन गर्दै महासचिव पोखरेलले कांग्रेस, माओवादी, राप्रपा र फोरमको घरभित्र पनि एमाले जन्मेको दाबी गरेका छन् ।
उनले दाबी भने, ‘यो गढ कांग्रेसको हो । यो गढ माओवादीको हो । यो गढ त राप्रपा र फोरमको हो भनेर नसोच्नु होला । यो पाँच वर्षको अवधिमा हाम्रो पार्टीले गरेको कामको आधारमा, हाम्रो अध्यक्षले गरेको कामको आधारमा कांग्रेसकै घरभित्र पनि एमाले जन्मिसकेको छ । माओवादीकै घरभित्र पनि एमाले जन्मिसकेको छ । राप्रपाको घरमा पनि एमाले जन्मिसकेको छ । त्यसैले हरेकका घरमा तपाईं जान जरुरी छ । कुनै घर नछोड्नु होला ।’
एमालेकै पालादेखि सामाजिक सुरक्षा भत्ता दिन शुरु गरेकाले जवानीमा कांग्रेस भएकाहरु पनि उमेर ढल्केपछि एमाले हुने सम्भावना बढेको उनले बताए । टिकट नपाएर रुष्ट भएका नेता-कार्यकतालाई सम्बोधन गर्दै उनले भने, ‘यो निर्वाचन जसले टिकट पाए उनीहरुको मात्र हो भनेर बुझ्नु हुँदैन । यो चुनाव भनेको पार्टीको चुनाव हो । देशका पक्षको चुनाव हो । राष्ट्रका पक्षका चुनाव हो भन्ने मान्यताका आधारमा पार्टीका पक्षमा दृढतापूर्वक लाग्न आग्रह गर्न चाहन्छु ।’
कार्यक्रममा एमालेबाट नेपालगञ्ज उपमहानगरपालिकाका नगर प्रमुखका उम्मेदवार पशुपति दयाल मिश्र, उपप्रमुखका उम्मेदवार शान्ति ढकाललगायतले समृद्ध नेपालगञ्जका बारेमा धारणा राखेका थिए ।
