‘तानसेनलाई पर्यटकीय केन्द्र बनाउँछौं’


२६ बैशाख २०७९, सोमबार
Rani mahal रानी महल

पाल्पा । आसन्न निर्वाचनमा पाल्पामा विभिन्न राजनीतिक दलका उम्मेदवारहरुले विकास र पूर्वाधार निर्माणका आकर्षक योजनाहरु अघि सारेका छन् । दुई नगरपालिका र आठ गाउँपालिका रहेको पाल्पामा गाउँमा शिक्षा, स्वास्थ्य, पर्यटन, कृषि, खानेपानी लगायतका योजनाहरु सञ्चालन गर्ने वाचा ती उम्मेदवारहरुले मतदाता समक्ष गरिरहेका छन् ।

      नेपाली काङ्ग्रेसबाट तानसेन नगरपालिकाको प्रमुखमा उम्मेदवार बनेका सन्तोषलाल श्रेष्ठ जनताले अनुभूत गर्ने गरी  सिंहदरबारको अधिकार घर-घर पुर्‍याउने बताउँछन् । शिक्षा, स्वास्थ्य, खानेपानी, यातायात, विद्युत्, कृषि, पर्यटन र रोजगारी सिर्जनालाई उनले आफ्नो प्राथमिकतामा राखेका छन् ।

   नेकपा (एमाले) का तर्फबाट प्रमुख पदका उम्मेदवार धनेन्द्रराज घिमिरेले तानसेनलाई स्मार्ट सिटीसहितको पर्यटकीय केन्द्र बनाएर सिङ्गो पाल्पालाई पर्यटकीय जिल्ला बनाउने योजना ल्याएका छन् । एमाले उम्मेदवारहरुले तानसेनका १४ वटै वडामा नागरिकलाई घरदैलो सेवा प्रदान गर्ने जनाएका छन् ।

       वडाबाटै योजना सम्झौता, अनुगमन मूल्याङ्कन तथा बजेट निकास गर्ने उनीहरुको योजना छ । मतदाताको विश्वास जित्न सबै किसिमका कृषि उत्पादनमा अनुदानको व्यवस्था गर्ने, श्रीनगरडाँडामा सेनकालीन ऐतिहासिक दरबार पुनर्निर्माण गर्ने र ठाउँ ठाउँमा सुन्दर पार्क निर्माण गर्ने आश्वासन एमाले तानसेनले दिँदै आएको छ ।

     माथागढी गाउँपालिकामा नेकाबाट पालिका अध्यक्षको उम्मेदवार बनेका सन्तोष थापा मगरले गएको पाँच वर्ष जनताकै सेवामा समर्पित भएको र अब पनि जनताकै सेवक बनेर काम गर्ने बताए ।      उनी भन्छन्, ‘पालिकामा विकास र समृद्धिका क्षेत्रमा धेरै काम गरेका छौं । केही सम्पन्न भएका छन् भने केहीको काम बाँकी रहेकाले तिनलाई पूरा गर्नेछु । माथागढीलाई देशकै नमूना पालिका बनाउन लागिपर्छौं ।’  बगनासकाली गाउँपालिकामा नेकाबाट पालिका अध्यक्षमा उम्मेदवार बनेकी सुनिता अधिकारीले जनताको हरेक समस्यामा साथ दिने प्रण गर्दै अन्य विकास कार्यक्रमका अतिरिक्त महिला सशक्तीकरणका लागि काम गर्ने वचनबद्धता प्रकट गरिन् ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७