पूर्व प्रमुख निर्वाचन आयुक्त यादव पर्यवेक्षकमा अस्वीकृत
काठमाडौं । निर्वाचन आयोगका पूर्व प्रमुख आयुक्त डा. अयोधीप्रसाद यादवले पर्यवेक्षकका लागि दिएको निवेदन अस्वीकृत भएको छ । आयोगले आफ्नै पूर्व प्रमुख आयुक्तलाई पर्यवेक्षकको अनुमति दिन अस्वीकार गरेको हो ।
कुनै राजनीतिक दलको विभागमा आवद्ध भएको पाइएपछि आयोगले यादवलाई पर्यवेक्षकको रुपमा स्वीकार नगरेको आयोगका एक अधिकारीले बताए । ‘आयोगकै एक जना व्यक्तिले उहाँ कुनै दलको केन्द्रीय विभागमा आवद्ध भएको जानकारी गराउनु भयो । त्यसबारे सोधपुछ गर्दा आवद्ध रहेको थाहा भएपछि अनुमती दिन सकेनौं’, आयोग स्रोतले भनेको छ ।
यादव नेकपा माओवादी केन्द्रको केन्द्रीय निर्वाचन विभागको सदस्य छन् । माओवादी केन्द्रले २३ मंसिर २०७८ मा जारी गरेको सूचीमा उनको नाम केन्द्रीय निर्वाचन विभागको सदस्य रहेको उल्लेख छ । आयोगले पूर्व न्यायाधीश, संवैधानिक निकायका अधिकारी तथा अवकाश प्राप्त विशिष्ठ श्रेणीका कर्मचारीलाई विशेष पर्यवेक्षकको रुपमा अनुमती दिने गरेको छ ।
