बाबुरामको गृहनगरमा एमाले र जसपाबीच तालमेल
गोरखा । सत्ता साझेदार दल जनता समाजवादी पार्टी (जसपा) ले गोरखामा प्रमुख प्रतिपक्ष दल नेकपा (एमाले) सँग चुनावी तालमेल गरेको छ । पालुङटार नगरपालिकामा जसपा र एमालेबीच तालमेल भएको हो ।
पालुङटार जसपाको संघीय परिषद्का अध्यक्ष डा. बाबुराम भट्टराईको गृहनगर हो । मंगलबार जसपाका जिल्ला अध्यक्ष यानप्रसाद भट्ट र एमालेका जिल्ला अध्यक्ष प्रेम गुरुङबीच तालमेलको सहमति भएको हो । सहमतिअनुसार यही वैशाख ३० गते हुने स्थानीय तह निर्वाचनमा नगर प्रमुख पदमा एमालेले जसपालाई सहयोग गर्नेछ । उपप्रमुख पदमा जसपाले एमाले उम्मेदवारलाई सहयोग गर्ने सहमति भएको छ ।
यस्तै, पालुङटारको वडा नम्बर-६, ७ र १० मा एमाले र वडा नम्बर-४ र ५ मा जसपालाई सघाउने सहमति गरिएको छ । जिल्लाका अरू पालिकाहरू र वडाहरूमा आपसमा सहमति गरी निर्वाचनमा जाने निणर्य भएको छ ।
यसअघि, पालुङटारमा जसपाले नेपाली कांग्रेससँग तालमेल गर्न खोजेको थियो । जसपाले नगर प्रमुख पद मागेको थियो । तर, कांग्रेस छोड्न तयार भएन । प्रमुख पद जसपालाई छोड्न सभापति शेरबहादुर देउवाले पनि प्रयास गरेका थिए । तर, सफल हुन नसक्दा जसपाले अन्त्यमा एमालेसँग तालमेल गरेको हो ।
