सपनाको उडान भर्न दिल्ली उडे सन्दिप
काठमाडौं, १३ चैत : विश्व क्रिकेटरहरूका लागि सर्वाधिक लोकप्रिय र ठूलो सपनाका रूपमा रहने इण्डियन प्रिमियर लिग (आइपिएल) मा सहभागी हुन नेपाली क्रिकेटका हिरो सन्दिप लामिछाने दिल्ली उडेका छन् ।
त्रिभुवन अन्तर्राष्ट्रिय विमानस्थलबाट उनी सवा १२ बजे दिल्ली प्रस्थान गरेका हुन् । दिल्ली प्रस्थान गर्नुअघि सन्दिपले पाएको अवसरलाई सदुपयोग गर्न आफूले कुनै कसर बाँकी नराख्ने बताएका छन् । उनले आइपिएलमा दबाबमुक्त भएर प्रदर्शन गर्ने र टिममा आफू रहनु वा नरहनु ठूलो कुरा नहुने बताए । आफ्नो जीवनको ठूलो सपना भनेकै नेपाली राष्ट्रिय टिमबाट खेल्नु भएको बताएका उनले आइपिएलमा आफूमाथि कुनै दबाब भने नरहेको स्पष्ट पारेका छन् ।
