रमेश खरेलको नेपाल सुशासन पार्टीले जित्यो एक वडाध्यक्ष
पर्सा । पूर्व डिआइजी रमेश खरेल नेतृत्वको नेपाल सुशासन पार्टीले पर्सामा एउटा वडामा विजय हासिल गरेको छ ।
पर्साको पोखरीया नगरपालिका-९ को वडा अध्यक्षमा सुशासन पार्टीका उम्मेदवार नौशाद आलम विजयी भएका छन् । आज विहान मत गणनाको अन्तिम नतिजा अनुसार आलम ८७७ मतका साथ वडा अध्यक्षमा निर्वाचित भएका हुन् ।
उनका निकटतम प्रतिस्पर्धी नेपाली कांग्रेसका रामबाबु चौहानले ६७८ मत मत प्राप्त गरेका छन् । पोखरीया नगरपालिकामा सुशासन पार्टीले मेयर र उपमेयरमा पनि उम्मेदवारी दिएको थियो । जारी मतगणनामा मेयर पदमा सुशासन पार्टीका उम्मेदवार शंकर यादव दोस्रो स्थानमा छन् । पहिलो स्थानमा भने एमालेका उम्मेदवार प्रधुमनप्रसाद चौहानले अग्रता लिइरहेका छन् ।
