भारत गएका देउवाले दूतावासमा बुच्चे नक्सा टाँसेर फर्किए : खगराज अधिकारी
काठमाडौं । प्रमुख प्रतिपक्षी दल नेकपा एमालेका सांसद खगराज अधिकारीले प्रधानमन्त्री शेरबहादुर देउवाले भारत भ्रमणका क्रममा दिल्ली राजदूतावासमा बुच्चे नक्सा टाँसेर आएको आरोप लगाएका छन् ।
प्रतिनिधिसभाको आइतवार बसेको बैठकमा बोल्दै सांसद अधिकारीले यस्तो बताएका हुन् । ‘प्रधानमन्त्री ज्यू भारत जाँदा नेपालको राजदूतावासमा बुच्चेनक्सा टाँसेर उहाँ आउनु भएको छ’ यसको जवाफ सत्ता पक्षका माननीय ज्यूहरुले दिन सक्नुहुन्छ ? सक्नु हुन्न भने तपाई नुन खाएको कुखुरा जस्तै हो कि होइन ?’
सरकारले प्रस्तुत गरेको विनियोजन बजेटमाथिको छलफलमा भाग लिँदै उनले मन्त्रालयगत कार्यक्रमको चर्चा गरेका थिए । देउवा भारत गएका बेला दिल्लीस्थित नेपाली दूतावासमा लिम्पियाधुरा, कालापानी र लिपुलेक नसमेटिएको बुच्चे नक्सा टाँसिएको थियो । त्यसलाई लिएर चर्को विरोध भएपछि दूतावासले हटाएर नयाँ चुच्चे नक्सा टाँसेको थियो ।
