आईजीपीविरुद्धको रिटमा आज पनि फैसला नहुने
काठमाडौँ । प्रहरी महानिरीक्षक (आईजीपी) नियुक्तिविरुद्धको रिटमाथिको फैसला आज (सोमबार) पनि नहुने भएको छ । कायम मुकायम प्रधानन्यायाधीश दीपककुमार कार्की र न्यायाधीश कुमार चुडालको इजलासमा पेसी तोकिएको यो मुद्दाको बहस नसकिएपछि आज फैसला नहुने भएको हो । रिट निवेदनक एआईजीपी विश्वराज पोखरेलको पक्षका अधिवक्ताले मंगलबार खाजा समय अघिसम्म बहसका लागि समय मागेका छन् ।
सर्वोच्च बारका अध्यक्ष समेत रहेका अधिवक्ता पूणर्मान शाक्यले भोलि खाजा समयसम्ममा बहस सक्ने इजलासमा बताएका छन् । सर्वोच्चमा अहिले एआईजी पोखरेलको तर्फबाट अधिवक्ता मेघराज पोखरेलले बहस गरिरहेका छन् । यसअघि तीन डीआईजीले हालेको रिटमाथि पक्ष-विपक्षकै बहस सकिएको छ ।
रिटमाथि कामु प्रधानन्यायाधीश कार्की र नयायाधीश चुँडालको इजलासमा अन्तिम सुनुवाइ चलिरहेको छ । रिट निवेदक पोखरेलको तर्फबाट बहस सकिएपछि मंगलबार नै विपक्षी महान्यायाधिवक्ता कार्यालय र निजी कानुन व्यवसायीहरुले बहस गर्नेछन् । सरकारले वैशाख १८ गते धीरजप्रताप सिंहलाई आईजीपीमा बढुवा गर्ने निणर्य गरेपछि एआईजी पोखरेलले सर्वोच्चमा रिट दायर गरेका थिए ।
रिटको सुनुवाइका लागि यसअघि जेठ १७ गतेको इजलासले सोमबारका लागि पेशी तोकेको थियो । गोलाप्रथाबाट पेशी तोक्दा कामु प्रधानन्यायाधीश कार्की र चुडालको इजलासमा परेको थियो । जेठ १७ मै अन्तिम सुनुवाइको मिति तोकिए पनि त्यसदिन सुनुवाइ हुन सकेको थिएन । त्यतिबेला न्यायाधीश विश्वम्भर प्रसाद श्रेष्ठ र चुँडालको इजलासमा परेको थियो ।
तर त्यस दिन सुनुवाइ नभएकाले चुँडालले रिटको सुनुवाइ गर्न मिल्ने एआईजी पोखरेलकी कानुनी सल्लाहकार अधिवक्ता सुनिता राउतले बताएकी थिइन्। पोखरेलको रिटसँगै अवकाश भइसकेका तीन डीआईजीको मुद्दा पनि सँगै राखिएको छ । सरकारले आफूभन्दा जुनियरलाई आईजीपी बनाएको भन्दै एआईजी पोखरेल सर्वोच्च पुगेका थिए । सँगै भर्ना भए पनि पोखरेल सिंहभन्दा १७ महिना पहिले एआईजी भएका थिए ।
सर्वोच्चले पोखरेलको पक्षमा फैसला नगरे उनी राजीनामा दिने तयारीमा छन् । एआईजीको उमेर हदका कारण साउन २० गते अनिवार्य अवकाश हुनेछन् । सिंहलाई आईजीपी स्वीकार्न नसक्ने भन्दै अहिले बिदा अस्वीकृत भए पनि कार्यालयमा हाजिर भएका छैनन् । २४ गते नै उनको बिदा सकिएको हो । उनी वैशाख १९ देखि बिदामा थिए । पोखरेलले थप १० दिन बिदा माग गरे पनि सिंहले नदिएर हाजिर हुन निर्देशन दिएका थिए ।
