मिछुर्लुङमा दृष्यावलोकन स्तम्भ


६ असार २०७९, सोमबार

तनहुँ । ग्रामीण पर्यटन प्रवद्र्धन गर्ने उद्देश्यसहित तनहुँको भिमाद नगरपालिका-५ स्थित मिछुर्लुङमा दृष्यावलोकन स्तम्भ (भ्युटावर) निर्माण गरिएको छ । देश तथा विदेशमा रहेका नेपालीबाट सङ्कलन गरिएको रकमबाट दृष्यावलोकन स्तम्भ निर्माण सम्पन्न भएको हो । गत मङ्सिर २१ गते दृष्यावलोकन स्तम्भको शिलान्यास गरिएको थियो ।

मिछुर्लङमा जन्मेर हाल बेलायतमा रहेका महेन्द्र आलेको परिकल्पनामा दृष्यावलोकन स्तम्भ निर्माण गरिएको हो । यसका लागि उनकै सक्रियतामा रु ३० लाख सङ्कलन भएको थियो । ‘गाउँको विकासका लागि केही गरौं भन्ने भावनासहित विदेशमा रकम सङ्कलन अभियान चलाएको थिएँ, गाउँमा आन्तरिक पर्यटक भित्र्याउने मुख्य लक्ष्य हो’, उनले भने, ‘ग्रामीण पर्यटनको माध्यमबाट स्थानीयवासीको आयआर्जन वृद्धिका लागि पनि स्तम्भ सहयोगी हुनेछ ।’

कूल रु ३८ लाख चार हजार ९०० को लागतमा दृष्यावलोकन स्तम्भ निर्माण गरिएको मिछुर्लुङ क्षेत्र विकास तथा भ्युटावर निर्माण समितिका अध्यक्ष नरेन्द्र थापाले जानकारी दिए । मिर्छुलुङ गाउँमा सञ्चालित घरवासको प्रवद्र्धनका लागि स्तम्भले सहयोग पुग्ने विश्वास लिइएको छ । ‘विगत केही वर्षदेखि यहाँ घरवास सञ्चालनमा छ, तर घरवासको प्रचारप्रसार हुन नसक्दा पर्यटकको चहलपहल हुन सकिरहेको छैन’, उनले भने, ‘स्तम्भ निर्माणपछि घरवासको पनि प्रवद्र्धन हुनेमा विश्वस्त छौँ ।’

मगर समुदायको कौरा, झ्याउरे, अर्गानिक परिकार मिर्छुलुङ घरवासको विशेषता हो । प्राकृतिक सौन्दर्यताले भरिपूणर् मिर्छुलुङमा झरना पनि छ । उक्त झरनामा एक पटक क्यानोनिङ समेत सञ्चालन गरिसकिएको छ । कोभिड-१९ को सङ्क्रमणका कारण दुई वर्ष घरवास प्रभावित बनेको थियो । अब कोभिडको जोखिम नरहेकाले घरवासमा पर्यटकको चहलपहल हुने अध्यक्ष थापाले बताए ।

दृष्यावलोकन स्तम्भको उद्घाटन गर्दै भिमाद नगरपालिकाका प्रमुख दधिराज सुवेदीले यसले मिर्छुलुङको पर्यटन प्रवद्र्धनमा टेवा पुग्ने बताए । ‘गाउँमा होमस्टे सञ्चालन छ, होमस्टेमा आउने पर्यटकलाई भ्युटावरबाट प्राकृतिक दृश्यावलोकन गराउन सके यहाँको थप प्रवद्र्धन हुन्छ’, उनले भने । पर्यटन प्रवद्र्धन गरी स्थानीयको आयआर्जनमा वृद्धि हुन सके मात्र भ्युटावर निर्माणको औचित्य रहेको उनले बताए ।

दुई पालिका जोड्ने झोलुङ्गे पुल

जिल्लामा दुई पालिका जोड्ने गरी निर्माण सुरु भएको झोलुङ्गे पुल सम्पन्न भएको छ । व्यास नगरपालिका-७ र म्याग्दे गाउँपालिका-६ जोड्ने साँगेखोलामा झोलुङ्गे पुल निर्माण सम्पन्न भएको हो ।

दुई पालिकाको लगानी, झोलुङ्गे पुल कार्यक्रम, स्थानीयवासीको श्रमदान, गैरसहकारी संस्था समन्वय समितिको प्राविधिक सहयोगमा उक्त ठाउँमा पुल निर्माण भएको हो । ४३ लाख दश हजार ६१ को लागतमा पुल निर्माण सकिएको समन्वय समितिका सचिव राजेश्वर हड्खलेले जानकारी दिए ।

पुल निर्माणका लागि पालिकाबाट रु पाँच लाख ६२ हजार ३५९, झोलुङ्गे पुल कार्यक्रमबाट रु ३६ लाख ६३ हजार ५५० लगानी गरेका छन् भने स्थानीवासीले रु ८४ हजार १४९ बराबरको श्रमदान गरेका छन् । पुल निर्माणका लागि विसं २०७८ पुस ८ गते उपभोक्ता समितिसँग सम्झौता भएको थियो । निर्माण कार्य भने फागुन १३ गतेबाट सुरु भएको थियो ।

६७ मिटर लामो झोलुङ्गे पुल निर्माण सम्पन्न भएपछि ७२ घरधुरीका ४३४ लाभान्वित भएका छन् । यहाँ पुल नहुँदा वर्षायाममा स्थानीयवासीलाई जोखिम मोलेर खोला तर्नुपर्ने बाध्यता थियो । पुल निर्माण भएपछि अब यहाँका स्थानीयवासीलाई सहजरुपमा आवतजावत गर्न सहज हुने भएको छ । रासस

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७