पर्साको कालिकामाईमा जसपा र कांग्रेस कार्यकर्ताबीच झडप, वडाध्यक्षसहित पाँच घाइते
पर्सा । पर्साको कालिकामाई गाउँपालिकामा नेपाली कांग्रेस र जनता समाजवादी पार्टीका कार्यकर्ताबीच झडप भएको छ ।
शुक्रबार डाकिएको गाउँ सभा स्थगित भइसकेपछि उनीहरुबीच झडप भएको हो ।
झडपमा परी वडा नं ३ का अध्यक्ष सञ्जयकुमार पटेलसहित पाँच जना घाइते भएका छन् । घाइतेहरुको वीरगञ्जस्थित नारायणी अस्पतालमा उपचार भइरहेको छ । वडा अध्यक्षको गालामा चोट लागेको छ ।
त्यसैगरी वडा नं ४ बस्ने अन्दाजी ७० वर्षीय महम्मद गफार मिया, ४० वर्षीय महम्मद एकबाल मिया, ४५ वर्षीय अकबर मिया र ३१ वर्षीय विजय चौरसिया घाइते भएका छन् ।
घाइतेमध्ये महम्मद मियाको टाउको र शरीरको विभिन्न भागमा चोट लागेको छ । घटनामा संलग्न रहेको आरोपमा ५५ वर्षीय ध्रुव साहलाई नियन्त्रणमा लिइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक ओम प्रकाश खनालले जानकारी दिए ।
