ओली पूर्व प्रधानमन्त्री बन्नुमा भूराजनीतिक कारण : उपेन्द्र यादव
काठमाडौँ । सत्ता साझेदार जनता समाजवादी पार्टीका अध्यक्ष उपेन्द्र यादवले केपी ओलीलाई सत्ताबाट हटाउन विदेशी शक्तिको पनि साथ रहेको बताएका छन् ।
नेपाल-चीनमैत्री समाजले शनिबार काठमाडौंमा आयोजना गरेको कार्यक्रममा पूर्व उपप्रधानमन्त्री समेत रहेका यादवले भूराजनीतिले ओलीलाई पूर्व प्रधानमन्त्री बनाई दिएको टिप्पणी गरे ।
यादवले भने, ‘हाम्रोमा भूराजनीतिको प्रभाव छ र राजनीतिक अस्थिरताको कारण पनि त्यही हो । पूर्व प्रधानमन्त्री केपी ओलीजी यहाँ हुनुहुन्छ । म पनि उहाँको क्याबिनेटमा उपप्रधानमन्त्री थिएँ । म पूर्व भएको केही समयपछि उहाँ पनि पूर्व हुनु भएछ । यसमा भूराजनीतिक प्रभाव पनि छ ।’ अध्यक्ष यादवले देशलाई भूराजनीतिक प्रभावबाट मुक्त गर्न राजनीतिक दलहरु बलियो बन्नुपर्ने बताए ।