इङ्ल्याण्डका बेन स्टोक्सले एक दिवसीय अन्तर्राष्ट्रिय क्रिकेटबाट सन्यासको घोषणा
काठमाडौँ । इङ्ल्याण्डका अलराउन्डर बेन स्टोक्सले एक दिवसीय अन्तर्राष्ट्रिय क्रिकेटबाट सन्यास लिने घोषणा गरेका छन् ।
इङ्ल्याण्ड एन्ड वेल्स क्रिकेट बोर्डले स्टोक्सले एक दिवसीय अन्तर्राष्ट्रियबाट सन्यास लिने घोषणा गरेको जनाएको छ । ३१ वर्षीय स्टोक्सले घरेलु मैदानमा आज दक्षिण अफ्रिकासँग पहिलो एक दिवसीय खेल्दै औपचारिक रुपमा सन्यास लिने भएका छन् ।
स्टोक्सले इङ्ल्याण्डका लागि १०४ एक दिवसीय अन्तर्राष्ट्रिय खेल खेलेका छन् । सन् २०१९ मा इङ्ल्याण्डले घरेलु मैदानमा भएको आईसीसी एक दिवसीय विश्व कप क्रिकेटको उपाधि नै जितेको थियो ।
स्टोक्सले यो विश्व कपमा ४ सय ६५ रन बनाएका थिए । स्टोक्स इङ्ल्यान्डको टेस्ट क्रिकेट टोलीको कप्तान रहेका छन् । सन् २०१९ को विश्व कप जित्ने सदस्यबाट सन्न्यास लिने स्टोक्स दोस्रो खेलाडी हुन् । यसअघि मोर्गनले सबै शैलीबाट सन्यास लिएका थिए ।
