आज कहाँ-कहाँ छ बाढीको जोखिम ?
काठमाडौँ । देशका अधिकांश स्थानमा आज पनि मेघगर्जन र चट्याङसहित बर्षाको सम्भावना रहेको मौसमविदले बताएका छन् । आज देशका चार प्रदेशमा भारी बर्षाको सम्भावना रहेको मौसमविदले जनाएका छन् ।
बर्षाका कारण देशका केही नदीहरूमा आज (शनिबार) पानीको बहाव उल्लेख्य बढ्ने पूर्वानुमान गरिएको छ । जल तथा मौसम विज्ञान विभागअन्तर्गतको बाढी पूर्वानुमान महाशाखाका अनुसार आज त्रिवेणीस्थित तमोर, सिम्लेस्थित अरुण, पारिगाउँस्थित महाकाली, मैनाचुलीस्थित कन्काई, पधेरादोभानस्थित वाग्मती, रजैयास्थित पूर्वी राप्ती, कुसुमस्थित पश्चिम राप्ती र चेपाङस्थित बबई नदीमा बहाव उल्लेख्य छ ।
अरू केही ठूला नदीमा बहाव सामान्य बढ्ने जनाइएको छ । आज संखुवासभा, कपिलवस्तु, दाङ, बाँके, बर्दिया, कैलाली, कञ्चनपुर, अछाम, डोटी, डडेलधुरा र आसपास भई बहने केही साना नदीहरूमा पनि बहाव बढ्ने छ । केहीमा आकस्मिक बहाव समेत हुन सक्ने पूर्वानुमान छ ।
