एभरटनमाथि चेल्सीको संघर्षपूर्ण जित
बेलायत । प्रि-सिजनमा खराब प्रदर्शन गरेको चेल्सीले इङलिस प्रिमियर लिगमा शनिबार एभरटनमाथि १-० को संघर्षपूर्ण जित निकालेको छ । पहिलो हाफको इन्ज्युरी समयमा जोर्जिन्होले पेनाल्टीबाट गरेको गोल नै निर्णायक रह्यो ।
नयाँ सिजनको तयारीका लागि अमेरिका गएको चेल्सीले त्यहाँ खराब प्रदर्शन गरेको थियो । यसक्रममा व्यवस्थापक थोमस टुचेलले टिम लिगका लागि तयार हुन नसकेको भन्दै चेतावनी समेत दिएका थिए ।
तर गुडसन पार्कमा भएको जितले चेल्सीलाई ठूलो राहत भएको छ । योसँगै चेल्सी लिगमा विजयी शुरुवात लिन सफल रह्यो । एभरटनको घरमा चेल्सी विजयी रहेको यो पाँच वर्षयताकै पहिलोपल्ट हो । एएफपी
