लिभरपुल र क्रिस्टल प्यालेसको बराबरी
काठमाडौँ । इङलिस प्रिमियर लिग फुटबलमा लिभरपुल र क्रिस्टल प्यालेसले बराबरी खेलेका छन् । उपाधि दाबेदार लिभरपुलले घरेलु मैदानमा गएराति भएको खेलमा क्रिस्टल प्यालेससँग एक-एक गोलको बराबरी खेलेको हो ।
खेलको दोस्रो हाफमा लिभरपुल १० खेलाडीमा समेटिएको थियो । क्रिस्टलका जोएचिम एन्डरसनलाई फल गरेपछि लिभरपुलका फरवार्ड डार्विन न्युनेजले रातो कार्ड पाएका थिए ।
खेलमा क्रिस्टल प्यालेसले सुरुवाती अग्रता बनाएको थियो । उसका विलफ्रिड जाहाले खेलको ३२ औं मिनेटमा गोल गरे । लिभरपुलका लुइस डियाजले खेलको ६१ औं मिनेटमा बराबरी गोल फर्काए । पहिलो खेलमा लिभरपुलले फुलह्यामसँग दुई-दुई गोलको बराबरी खेलेको थियो ।
लिभरपुलको २ खेलमा २ अङ्क भएको छ । लिभरपुल अङ्क तालिकामा १२ औं र क्रिस्टल प्यालेस एक अङ्कसहित १६ औं स्थानमा छ ।