बाबुरामजीसँग चुनावअघि एकता हुँदैन : प्रचण्ड
सिट फाँटफाँटमा स्थानीय तह निर्वाचनमा जस्तो हतारो र चटारोमा छैन, समय छँदै टुंग्याउँछौं’
गोरखा । सत्तारुढ नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले प्रदेश र प्रतिनिधिसभा अगाडि डा. बाबुराम भट्टराईसँग एकताको सम्भावना नभएको बताएका छन् ।
नेपाल जेसिजको क्षेत्र ‘ख’ सम्मेलनमा सहभागी हुन शुक्रबार गोरखा आएका माओवादी केन्द्रका अध्यक्ष प्रचण्डले चुनावमा एउटै चिन्हबाट लड्ने सहमति भए पनि तत्कालै पार्टी एकता नहुने बताए । उद्दपी उनले नेपाल समाजवादी पार्टीका अध्यक्ष बाबुराम भट्टराई र आफूहरु फेरि एकै ठाउँमा उभिनु गोरखाका लागि विशेष महत्व रहने बताए ।
‘बाबुरामजी र हामी फेरि एकै ठाउँमा उभिने भइयो, यो गोरखाका लागि विशेष महत्व कुरो हो,’ उनले भने । निर्वाचनपछि भट्टराई नेतृत्वको नेसपार्टीसँग एकताको संभावना रहेको पनि उनले बताए । गोरखा क्षेत्र नम्बर २ बाट भट्टराईलाई उमेदवार बनाउने हो ? भन्ने पत्रकारको प्रश्नमा भने को-कहाँबाट उठ्ने भन्ने नटुंगिएको प्रचण्डले बताए ।
प्रचण्डले गठबन्धन भित्रको सिट बाँडफाँट पनि केही दिनभित्र टुंगिने बताए । ‘कार्यदलले लगातार काम गरिरहेको छ, अहिलेसम्म सकारात्मक दिशातर्फ छौं, जटिलता छैन,’ उनले भने, ‘सम्भवतः केही दिनभित्रै कुन पार्टीले कति सिट भनेर निर्धारण हुन्छ ।’
स्थानीय तह निर्वाचनमा जस्तो हतारो र चटारोमा नभई समय छँदै टुंग्याउने प्रचण्डको भनाइ छ । ‘समय छँदै टुंग्याउँछौं, स्थानीय तहमा जस्तो हतारो र चटारो हुँदैन, अन्तिम समयसम्म नटुंगिने, सम्झाउन पनि नपाइने स्थानीय तहको जस्तो स्थिति अहिले हुँदैन, बेलैमा टुंग्याउँछौं,’ उनले भने । २०७४ को निर्वाचन परिणाम र स्थानीय तहको मत एवं अहिलेको स्थितिलाई हेरेर सिट बाँडफाँट हुने दाहालले बताए ।
