चीन र बंगलादेशसँग पिटिए गर्ने उर्जामन्त्री पुनको घोषणा
काठमाडौं, २१ चैत : ऊर्जा, जलस्रोत तथा सिंचाइ मन्त्री वर्षमान पुनले उर्जा क्षेत्रमा लगानी गर्न आग्रह गरेका छन् । थाइल्यान्डको बैंककमा आयोजित दोस्रो एसिया तथा प्रशान्त क्षेत्रीय इनर्जी फोरमलाई सम्बोधन गर्दै मन्त्री पुनले नेपालमा स्थायित्व र विकासको युग सुरु भएको भन्दै विदेशी लगानीकर्तालाई नेपालमा लगानी गर्न आग्रह गरेका हुन् ।
उनले विगतको तुलनामा ऊर्जा तथा जलविद्युत विकासमा उल्लेख्य सुधार भएको दावी समेत गरे । मन्त्री पुनले चीन र बंगलादेशसंग द्विपक्षीय विद्युत व्यापार तथा समन्वय प्रक्रिया सुरु भएको जानकारी दिए । उनले भारतसँग विद्युत व्यापार सम्झौता (पिटिए) भइसकेको जानकारी दिंदै अव बंगलादेश र चीनसँग पनि छिट्टै उक्त सम्झौता हुने बताए ।
मन्त्री पुनले उर्जा तथा विद्युतको क्षेत्रमा चीनसहित सार्क र विमस्टेक स्तरमा क्षेत्रीय सहकार्य हुनुपर्नेमा जोड दिए । भने, ‘हामीले भारतसँग पिटिए सम्झौता गरिसकेका छौ, अव चीन र बंगलादेशसँग पनि हामी पिटिए गर्ने तयारीमा छौ, यसबाछ क्षेत्रीय विकासमा योगदान पुग्ने विश्वास हामीले लिएका छौं ।’
मन्त्री पुनले नविकरणीय उर्जालाई प्रवद्र्धन गर्ने सरकारको निती भएको बताए । वैदेशिक लगानीको सुरक्षामा सरकारले ध्यान दिएको भन्दै उर्जा क्षेत्रमा लगानी गर्न समेत आग्रह गरे । सदस्य राष्ट्रहरुको घनिष्ट सम्बन्धमा जोड दिंदै उर्जामन्त्री पुनले विद्युतलाई आर्थिक विकाससंग जोड्न पनि सदस्य राष्ट्रबीच अन्तर–आवद्धता आवश्यक रहेको बताए ।
उर्जामन्त्रीले भेटे म्यानमार र पाकिस्तानी समकक्षी
उर्जामन्त्री पुनले म्यानमारका उर्जामन्त्री जयर अंग र पाकिस्तानी समकक्षी अहमद खानसंग भेटवार्ता गरेका छन् । मन्त्री पुनका प्रेस संयोजक रोशन खड्काकाअनुसार भेटमा पाकिस्तानी उर्जामन्त्रीले आफ्नो देशको उर्जा क्षेत्रको अवस्थाका बारेमा उर्जामन्त्री पुनलाई जानकारी गराए । पाकिस्तानी उर्जामन्त्री नविकरणिय उर्जामा जोड दिन र स्मार्ट विलिङ सिस्टममा जान मन्त्री पुनलाई सुझाव दिए ।
विमस्टेक उर्जा फोरमको अध्यक्षता गरिरहेको म्यानमारका उर्जामन्त्री जयर अंगसंगको भेटमा मन्त्री पुनले फोरमको तेस्रो वैठकको अध्यक्षता नेपालले गर्ने तयारी गरिरहेको बताए । उनले त्यसको अवसरमा नेपाल भ्रमण गर्न समेत निम्तो दिए ।
