एमालेबाट सुदूरपश्चिम प्रदेशसभा सदस्य थापासहित ६ जना निष्काशित
कैलाली । नेकपा एमाले कैलालीका पूर्व अध्यक्ष तथा सुदूरपश्चिम प्रदेशसभा सदस्य रतन थापासहित ६ जनालाई एमाले कैलालीले साधारण सदस्य समेत नरहने गरी पार्टीबाट निष्काशन गरेको छ ।
एमाले कैलालीका कार्यवाहक अध्यक्ष दुर्गाप्रसाद जोशीले विज्ञप्ति जारी गर्दै पार्टीको विधानको धारा ८१ को उपधारा १ बमोजिम उनीहरूलाई कारबाही गरिएको जनाएका छन् ।
वैशाख ३० गते सम्पन्न स्थानीय तहको निर्वाचनमा अन्तरघात गरेको भन्दै अध्यक्ष पदबाट बर्खास्त गरिएका थापा बिहीबार मात्रै नागरिक उन्मुक्ति पार्टीमा प्रवेश गरेका थिए ।
उनीसँगै एमालेले उनकी पत्नी समेत रहेकी लम्कीचुहा नगरपालिकाकी निवर्तमान उपमेयर टीका थापा, तुला थापा, धरम थापा, दुजराम चौधरी र पूणर् साउदलाई पनि कारबाही गरिएको हो ।