श्रीमान-श्रीमती दुवैलाई टिकट दिने परिपाटी हटाउनु पर्छ : सांसद लामा
काठमाडौं । सत्तारुढ नेपाली कांग्रेसका सांसद जिपछिरिङ लामाले आउँदो चुनावमा श्रीमान-श्रीमती दुवैलाई टिकट दिने परिपाटी हटाउनु पर्ने बताएका छन् । शुक्रवारको प्रतिनिधि सभा बैठकमा समय माग गरी बोल्दै उनले यस्तो बताएका हुन् ।
सांसद लामाले श्रीमान् र श्रीमती दुवै जना उम्मेदवार भएमा उम्मेदवारी खारेज गर्ने नियम बनाउनका लागि निर्वाचन आयोगलाई अनुरोध गरे । उनले भने, ‘श्रीमानले प्रत्यक्ष टिकट पायो भने श्रीमती समानुपातिकमा, श्रीमान् समानुपातिकमा भए श्रीमती प्रत्यक्षमा हुने परिपाटी हटाउनु पर्छ । श्रीमान्, श्रीमती दुवै सांसद हुँदा पार्टीका अरू कार्यकर्ताले टिकट नपाउने र त्याग, तपस्या गर्नेहरू सधैँ समस्या परिरहने अवस्था छ ।’
सांसद लामाले नेपाली भूमि लिपुलेक कहिले फिर्ता आउँछ ? भनी सरकारलाई प्रश्न पनि गरेका छन् । उनले भने, ‘म अहिलेको सरकारलाई पनि सोध्न चाहन्छु, लिपुलेक हाम्रो जमिन हो । त्यो छिमेकीसँग वार्ता गरेर जमिन कहिले फिर्ता आउँछ ? म सोध्न चाहन्छु ।’
