भारतले अफगानिस्तानलाई फराकिलो अन्तरले हरायो, कोहलीको शतक
काठमाडौं । एसिया कप क्रिकेट सुपर चारको आफ्नो अन्तिम खेलमा भारतले अफगानिस्तानलाई फराकिलो अन्तरले पराजित गरेको छ । गए राति दुबईमा भएको खेलमा भारतले अफगानिस्तानलाई १०१ रनले हराएको हो ।
भारतले दिएको २१३ रनको लक्ष्य पछ्याएको अफगानिस्तानले २० ओभरमा ८ विकेट गुमाएर १११ रन मात्र बनाउन सक्यो । अफगानिस्तानका इब्राहिम जाड्रनले अविजित ६४ रनको अर्धशतकीय पारी खेले । भारतका भुवनेश्वर कुमारले ५ विकेट लिए । त्यसअघि पहिले ब्याटिङ गरेको भारतले २० ओभरमा २ विकेट गुमाएर २१२ रन जोडेको थियो ।
भारतका विराट कोहलीले अविजित १२२ रनको शतकीय पारी खेले । उनको यो पहिलो टी-२० अन्तर्राष्ट्रिय शतक पनि हो । योसहित कोहलीले करियरको ७१औं शतक बनाएका छन् । त्यस्तै कप्तान केएल राहुलले ६२ रनको अर्धशतकीय पारी खेले । अफगानिस्तानका फारिद अहमदले २ विकेट लिए ।
भारतको यो सान्त्वना जित मात्रै हो । आज पाकिस्तानले सुपर चारको अन्तिम खेलमा श्रीलङ्कासँग खेल्नेछ । उपाधिका लागि आइतवार श्रीलङ्का र पाकिस्तान नै खेल्नेछन् ।
