‘अग्निपथ’ बारे तत्काल निर्णय हुने सम्भावना छैन : परराष्ट्र मन्त्रालय
काठमाडौं । परराष्ट्र मन्त्रालयले भारतको सैन्य भर्ती योजना ‘अग्निपथ’ का विषयमा तत्काल नेपालका तर्फबाट कुनै पनि निणर्य नहुने स्पष्ट पारेको छ ।
आज (बिहीबार) सिंहदरबारमा आयोजित नियमित पत्रकार सम्मेलनमा परराष्ट्र मन्त्रालयकी प्रवक्ता सेवा लम्सालले अग्निपथ योजनाबारे तत्काल निर्णय हुने सम्भावना नभएको बताएकी हुन् । अहिले सरकार पूर्ण रूपमा निर्वाचनको तयारीमा लागेको र यस विषयमा राष्ट्रिय सहमति समेत आवश्यकता पर्ने भएको हुँदा अहिले निणर्य नहुने उनको भनाइ छ ।
‘नेपाल सरकारको निणर्य भनेको नै नवनिर्वाचित सरकारले गर्ने भन्ने हो,’ उनले भनिन् । प्रवक्ता लम्सालले प्राकृतिक प्रकोपमा फसेको पाकिस्तानलाई मानवीय हिसाबले नेपालले सक्ने सहयोग गरेको र आगामी दिनमा सहयोग आदान प्रदान हुने बताइन् ।
नेपालले तत्कालै ‘अग्निपथ’ अन्तर्गतको गोर्खा भर्तीका विषयमा निर्णय नदिए नेपालीका लागि छुट्याएको सीट फिर्ता हुने भारतीय सेना प्रमुख मनोज पाण्डेले बताएका थिए ।
अग्निपथ अन्तर्गत भदौ ९ गते बुटवलमा र भदौ १६ गते धरानमा तय गरिएको गोर्खा भर्ती सरकारले रोकेको छ । जसले गर्दा नेपालबाट गोर्खा भर्ती प्रक्रिया अघि बढ्न सकेको छैन । नयाँ दिल्लीमा युनाइटेड सर्भिस इन्स्टिच्युसन अफ इण्डियाले आयोजना गरेको कार्यक्रममा बोल्दै भारतीय सेनाध्यक्ष पाण्डेले यदि नेपालले स्वीकृती नदिए गोर्खाका लागि छुट्याइएका सीट अन्यत्र बाँडिने बताएको भारतीय सञ्चारमाध्यम टाइम्स अफ इण्डियाले लेखेको छ ।
