सलमानका डुप्लिकेट डबल सागरको निधन
मुम्बई । बलिउड अभिनेता सलमान खानका डुप्लिकेट तथा उनका बडी डबल सागर सलमान पाण्डेको निधन भएको छ । सागरको निधन जिम वर्कआउटको समयमा भएको थियो । सागर अन्दाजी ५० वर्षका थिए ।
उनी सन् १९९९ देखि सलमानको फिल्ममा उनको बडी डबल बन्दै आएका थिए । उनले आफ्नो करियरको शुरुवात फिल्म ‘कुछ कुछ होता हे’ बाट गरेका थिए । यसपछि उनले ५० बढी फिल्ममा काम गरिसकेका थिए ।
सागरको निधनको पुष्टि सलमानका अर्का बडी डबल शान्तनु घोषले गरेका छन् । शान्तनुका अनुसार सागरलाई तुरुन्तै मुम्बईको जोगेश्वरी इस्टस्थित हिन्दी हृदय सम्राट बालासाहेक ठाकरे ट्रमा केयर मुन्सिपल अस्पतालमा लगिएको थियो । अस्पताल पुग्नासाथ डाक्टरले उनलाई मृत घोषणा गरेका थिए ।
सागर सलमान जस्तै अविवाहित थिए । सागरका पाँच भाइ थिए र सबैको खर्च उनले नै व्यहोर्थे । उनले ‘बजरंगी भाइजान’, ‘ट्यूबलाइट’, ‘दबंग’, ‘दबंग २’ जस्ता फिल्ममा सलमानको बडी डबलको भूमिका निर्वाह गरेका थिए ।
