रेशमको उम्मेदवारी खारेजीपछि उन्मुक्ति पार्टीले उनका बुबालाई सघाउँदै
काठमाडौं । रेशमलाल चौधरीको उम्मेदवारी खारेज भएपछि नागरिक उन्मुक्ति पार्टीले रेशमका बुबा लालवीर चौधरीलाई समर्थन गर्ने भएको छ ।
टीकापुर घटनामा दोषी ठहर भएर सजाय भोगिरहेकाले रेशमलाल चौधरीले वारेसमार्फत बर्दिया–२ मा दर्ता गराइएको उम्मेदवारी असोज २५ गते खारेज भएको थियो । रेशमले आफ्नै श्रीमती रन्जिता श्रेष्ठ चौधरी अध्यक्ष रहेको नागरिक पार्टीबाट उम्मेदवारी दिएका थिए ।
आफ्नो पार्टीले रेशमका बुबा लालवीरलाई समर्थन गर्ने नागरिक उन्मुक्ति पार्टीकी अध्यक्ष श्रेष्ठले जानकारी दिएकी छन् । लालवीरले स्वतन्त्र उम्मेदवारी दिएका छन् । २०७४ को निर्वाचनमा लालवीर नेकपा (एमाले) कैलाली–१ मा प्रदेश सभा सदस्य उम्मेदवार थिए । त्यस्तै लक्ष्मण थारूको उम्मेदवारी खारेज भएपछि कैलाली–५ मा नागरिक उन्मुक्ति पार्टीले स्वतन्त्र उम्मेदवार जगदीश चौधरीलाई समर्थन गर्ने भएको छ । टीकापुर घटनामा दोषी ठहर भएका थारू फरार सूचीमा छन् ।
