देशैभर प्याराग्लाइडिङ उडाउन प्रतिबन्ध
काठमाडौं । सरकारले देशभर प्याराग्लाइडिङ उडाउन अनिश्चितकालका लागि प्रतिबन्ध लगाएको छ । नेपाल नागरिक उड्डयन प्राधिकरणले अर्को व्यवस्था नभएसम्म देशैभर सबै प्रकारका प्याराग्लाइडिङ उडान बन्द गर्ने निर्णय गरेको प्राधिकरणका प्रवक्ता जगन्नाथ निरौलाले जानकारी दिए ।
अर्को व्यवस्था नभएसम्म देशभर मनोरञ्जनात्मक, व्यावसायिक र खेलकुदजन्य सबै प्रकारका प्याराग्लाइडिङ उडान बन्द गर्ने निर्णय भएको जानकारी दिंदै उनले अब उडान सुरक्षाबारे सुक्ष्म अध्ययन गरिने बताए ।
आज (आइतबार) मात्र पोखराको सराङकोटमा राष्ट्रिय खेलकुदका दौरानमा प्याराग्लाइडिङ दुर्घटना भएको छ । सो क्रममा नेपाली सेनाका एक खेलाडीको मृत्यु भएको छ । नवौं राष्ट्रिय खेलकुद प्रतियोगिताअन्तर्गत प्याराग्लाइडिङको क्रस कन्ट्री प्रतियोगितामा सहभागी एक प्रतियोगीको दुर्घटनामा निधन भएको हो ।
मृत्यु हुनेमा नेपाली सेनाको तर्फबाट प्रतियोगितामा सहभागी पोखरा १० हस्पिटल चोकका निसिम थापा रहेका छन् । २६ वर्षीय थापा प्याराग्लाइडिङका उत्कृष्ट खेलाडीमध्येका एक भएको पाइलट लक्ष्मण न्यौपानले जानकारी दिए । योसँगै प्राधिकरणले देशैभर प्याराग्लाइडिङ उडान बन्द गर्ने निर्णय प्राधिकरणले गरेको हो । निरौलाका अनुसार अब उडानको सुरक्षा, ऐन नियम र प्रावधानहरुबारे समेत प्राधिकरणले अधययन गर्ने भएको छ । सोहीकारण तत्कालका लागि सबै उडान बन्द गर्ने निर्णय भएको उनले जानकारी दिए ।
