नवौं राष्ट्रिय खेलकुद : एन्टी डोपिङ परीक्षणमा ४० खेलाडी
काठमाडौं । पोखरामा आज सम्पन्न हुँदै गरेको नवौँ राष्ट्रिय खेलकुद प्रतियोगितामा विभिन्न खेलका ४० जना खेलाडीको एन्टी डोपिङ परीक्षण गरिएको छ । राष्ट्रिय खेलकुदको इतिहासमा पहिलो पटक यो अभ्यास गरिएको हो ।
पोखरामा जारी नवौँ राष्ट्रिय खेलकुदमा एन्टी डोपिङ सुरु गरिएको राष्ट्रिय खेलकुद परिषद्अन्तर्गत गठित एन्टी डोपिङका उपसमितिका सचिव डा. ज्ञानेन्द्र शाहले जानकारी दिए ।
‘राष्ट्रिय खेलकुदको इतिहासमा नै पहिलोपटक यो अभ्यास सुरु भएको छ । यसले नेपाली खेलकुदको स्वच्छतालाई अघि बढाउन सहयोग पुग्ने छ’, दक्षिण एसिया एन्टी डोपिङका सदस्य समेत रहेका डा. शाहले भने, ‘यो निकै संवेदनशील विषय हो । हामीले गरेको नमूना संकलन कुनै पनि दक्षिण एसियाली खेलकुदको इतिहासमा धेरै हो । हामीले गरेको नमूना संकलनहरु कतार पठाएका छौँ । नतिजा प्राप्त हुन केही समय कुर्नुपर्ने हुन्छ ।’
डा. शाहले पदक जित्न खेलाडीहरू शक्तिवद्र्धक औषधि प्रयोग गरेका कारण एन्टी डोपिङबाट पदक खोसिएको इतिहास पनि भएको बताए । डा. शाहले नेपाली राष्ट्रिय खेलाडीहरूले अब आफ्नै क्षमतामा निर्भर हुनुपर्ने बताए । खेलाडीले जितेको पदक र खेललाई आधिकारिकता दिन एन्टी डोपिङको समेत विशेष भूमिका हुने उनले बताए ।
पोखरामा जारी राष्ट्रिय प्रतियोगितामा एन्टी डोपिङका लागि दक्षिण एसियाली एन्टी डोपिङ संस्थाले सहयोग गरेको उनले जानकारी दिए । राखेपले एन्टी डोपिङका लागि डा. नविशमान सिंहको संयोजकत्वमा ६ सदस्य कमिटी बनाएको थियो ।
