भूकम्पका घाइतेको तत्काल उद्धार गर्न गृहमन्त्रीको निर्देशन (तस्वीरहरु)
![](https://www.nayapage.com/images/newlog1.jpg)
काठमाडौं । गृहमन्त्री बालकृष्ण खाँणले भूकम्पमा परी घाइते भएकाको यथाशीघ्र अस्पतालसम्म पुर्याइ उपचारको व्यवस्था गर्न गृह प्रशासन र सुरक्षा निकायलाई निर्देशन दिएका छन् । गए राति डोटीको पूर्वीचौकी गाउँपालिका–३ गैरागाउँमा केन्द्रविन्दु बनाइ भूकम्प गएको थियो ।
उनले घाइतेको उपचारका लागि हेलिकप्टरको व्यवस्था गर्नुपर्ने भएमा तत्काल प्रबन्ध मिलाउन निर्देशन समेत दिए । गृहसचिव विनोदप्रकाश सिंह, मन्त्रालयका सुरक्षा समन्वय महाशाखा प्रमुख सहसचिव फणिन्द्रमणि पोखरेल र विपद् महाशाखा तथा सुरक्षा निकायलाई तत्काल घाइते हेलिकप्टरबाट उद्धार गर्न निर्देशन दिएका हुन् ।
गृहमन्त्री खाँणले घाइतेहरुको अवस्था र अहिले उनीहरुलाई तत्कालका लागि गरिएको अवस्थाबारे पनि जानकारी लिए । उनले भूकम्पमा परेर प्रभावित भएकालाई राहतको तत्काल व्यवस्था गर्दै उचित स्थानमा बासस्थानको व्यवस्था गर्न पनि निर्देशन दिएका छन् । भूकम्पमा परेर अहिलेसम्म ६ जनाको मृत्यु भएको छ भने ६ जना नै घाइते भएका गृह मन्त्रालयले जनाएको छ । गृहमन्त्री खाँणले भूकम्पमा परी मृत्यु भएकाहरुप्रति श्रद्धाञ्जलि व्यक्त गर्दै परिवारमा समवेदना तथा घाइतेहरुको शीघ्र स्वास्थ्य लाभको कामना गरेका छन् ।
![](https://s3.nayapage.com/uploads/2022/11/Bhukampa-1-768x568.jpg)
![](https://s3.nayapage.com/uploads/2022/11/Bhukampa-2-768x576.jpg)
![](https://s3.nayapage.com/uploads/2022/11/Bhukampa-3-768x599.jpg)
![](https://s3.nayapage.com/uploads/2022/11/Bhukampa-4-768x575.jpg)
![](https://s3.nayapage.com/uploads/2022/11/Bhukampa-5-768x576.jpg)
![](https://s3.nayapage.com/uploads/2022/11/Earthquake-in-Doti-1-1-768x433.jpg)
![](https://s3.nayapage.com/uploads/2022/11/Earthquake-in-Doti-6-768x433.jpg)
![](https://s3.nayapage.com/uploads/2022/11/202211090941-d5282163-9acd-4269-83c7-c491ca64a269_medium.jpg)