जाजरकोटको बिम्ब र जाजरकोटीको जीन्दगी बदल्ने अवसरको खोजीमा निरज
काठमाडौं : कर्णाली प्रदेशको दुर्गम जिल्ला जाजरकोट । काठमाडौंतिरबाट फर्केर हेर्दा जाजरकोट धेरै पर देखिन्छ । अशिक्षा, अभाव, महामारी, पहिरो आदि जाजरकोटसँगै आउने बिम्ब हो । शहरमा जाजरकोटबाट जहिल्यै अशुभ खबर आइपुग्छ । ‘जाजरकोटमा झाडापखालाको महामारी’, जाजरकोटमा पहिरो जादा यति जनाको मृत्यु । यस्ता समाचारहरुसँग जाजरकोटको परिचय जोडिएको छ । यस प्रकारको समाचारहरु जाजरकोटको हकमा जहिल्यै दोहोरीरहन्छ ।
हरेक चुनावहरुमा उम्मेदवारहरुले भन्छन्, ‘अब जाजरकोटको समस्या सम्बोधन गर्नेछौं ।’ तर भेरीमा धेरै पानी बगीसक्यो जाजरकोटीहरुको जीन्दगी उस्तै छ । उही अभाव, महामारी संकट, अशिक्षा, बेरोजगारी दोहोरीरहन्छ । यही कष्टपूर्ण जीन्दगी बदल्ने संकल्प बोकेर निरज आचार्य अहिले जाजरकोटको दुर्गम बस्तीहरुमा पुगिरहेका छन् ।
नेकपा (एमाले)का केन्द्रीय सदस्य आचार्य प्रतिनिधिसभा सदस्यका लागि जाजरकोटबाट उम्मेदवार बनेका छन् । उनी भनिरहेका छन्, ‘पटक पटक अरुलाई जिताएर पठाउनुभयो । हाम्रो जीन्दगी उस्तै छ । हाम्रो जिल्ला उस्तै छ । एक पटक मलाई जिताएर पठाउनुहोस् । म जाजरकोटको बिम्ब र जाजरकोटीको जीन्दगी बदल्छु ।’
जाजरकोटको जीन्दगी बदलिएको खबर काठमाडौं शहरतिर पठाउने संकल्प छ, उनको । भन्छन्, ‘जाजरकोटमा यस्तो विकास भयो । यहाँका मान्छेहरुको जीन्दगी यसरी बदलियो जस्ता समाचार शहरमा पठाउने गरी हामी काम गर्नेछौं । महामारी भनेकै जाजरकोटमा हुन्छ, अभावमा बाँच्ने नै जाजकारकोटी हुन् भन्ने बिम्ब भत्काउँन चहान्छौं ।’
संगठनमा निरन्तर निरज
२०३३ सालमा जाजरकोटको जगतिपुरमा जन्मिएका निरजले २०५४ देखि यता जाजरकोट दुःखलाई नजिकबाट देखेका छन् । जाजरकोटीहरुको दुःखलाई नजिकबाट छोएका छन् । २०५४ सालको स्थानीय चुनावमा नै उनी जिल्ला विकास समितिको सदस्यमा निर्वाचित भएका थिए । उतिबेला उनी मात्रै १८ वर्ष कटेका थिए ।
जिल्ला विकास समितिको सदस्य भएसँगै एमालेको युवा संगठन प्ररायु संघको महाधिवेशन सहभागी भए । २०५४ चैतमा सम्पन्न तेस्रो राष्ट्रिय सम्मेलनबाट निरजले केन्द्रीय सँगै, तत्कालीन भेरी अञ्चल संयोजक तथा इन्चार्जको जिम्मेवारी पाए ।
०५८ मा केन्द्रीय कार्यालय सचिव नै बने । विराटनगरमा २०६३ सालमा सम्पन्न छैटौं राष्ट्रिय सम्मेलनबाट उनी संगठन विभाग प्रमुख र लहानमा सम्पन्न सातौं महाधिवेशनबाट महासचिव बने । आठौं महाधिवेशनमा उनी युवा संघको अध्यक्षकै दावेदार थिए, तर पराजित भए ।
उनी २०५४ देखि लगातार जिल्लाको पार्टीको भूमिकामा पनि थिए । ९ वर्ष जिल्ला सदस्य, यसपछि भेरी अञ्चल कमिटी सदस्य, राष्ट्रिय परिषद सदस्य र केन्द्रीय श्रम तथा रोजगार विभाग सचिवको भूमिकामा क्रमशः रहे । ३ जेठ २०७५ मा माओवादी केन्द्रसँग एकता भएपछि निरज पार्टीकै केन्द्रीय सदस्य भए । दशौं महाधिवेशनबाट पनि उनी केन्द्रीय सदस्य दोहोरिए ।
बदल्ने अवसरको खोजी
त्यसो त निरजले २०७४ को निर्वाचनमा नै प्रदेशसभा क बाट टिकट पाएका थिए । पर्चा छापेर सकेका निरजको अन्तिम समयमा टिकट खोएिको थियो । एमाले माओवादी सिट बाँडफाँटका क्रममा जाजरकोटको प्रतिनिधिसभा माओवादीलाई र प्रदेशसभा दुवै एमालेको भागमा परेको थियो । तर, उम्मेदवारी मनोयनका दिन हुम्लामा एक सिट माओवादीले पाउने भएपछि जाजरकोट एमालेले एउटा छाड्ने सहमति केन्द्रमा भयो ।
निरजले अन्तिम समयमा पार्टीको निर्देशनपछि आफ्नो उम्मेदवारी फिर्ता लिए । यस पटक उनले प्रतिनिधिसभाको टिकट पाएका छन् । उनको प्रतिस्पर्धी गठबन्धनबाट पूर्वमन्त्री शक्ति बस्नेत छन् । बस्नेत २०६४ मा समानुपातिकतर्फबाट पहिलो संविधानसभामा पुगे । २०६८ मा स्वास्थ्य तथा जनसंख्या मन्त्री बन्ने अवसर पाएका उनी २०७० को दोस्रो संविधानसभा निर्वाचनमा प्रत्यक्ष निर्वाचित भएर गृहमन्त्री बने ।
२०७४ को प्रतिनिधिसभा चुनावमा विजयी भएसँगै उनी वन तथा वातावरणमन्त्री भए । एमाले–माओवादी केन्द्र गठबन्धन भएको अघिल्लो चुनावमा ३२ हजार २८१ मतका साथ विजयी बनेका बस्नेतलाई यसपटक सत्ता गठबन्धनको साथ छ ।
बस्नेत सांसद मात्रै होइन पटक पटक मन्त्री भएका छन् । बस्नेतको बलियो पक्ष यही हो । तर निरजले यहीमाथि प्रहार गरिरहेका छन् । भन्छन्, ‘जिल्लाको विकासको लागि पद वा ठुलो नेता होइन उर्जा, उत्साह र जाँगर भएको जनप्रतिनिधि चाहिन्छ । जाजरकोटको बिम्ब र जाजरकोटीको जीन्दगी बदल्न चहान्छु ।’
निरजले जिल्लाको विकासको लागि मार्गचित्र तयार पारेका छन् । उनी भन्छन्, ‘अब जाजरकोटमा विरासत वा इतिहासका कुरा होइन कसले जाजरकोटीको कष्टसाध्य वर्तमानलाई बदल्न सक्छ, उसले अवसर पाउने हो । शक्ति बस्नेत पटक पटक मन्त्री भएर जिल्लाले के पायो ? जाजरकोटी जनताको जीन्दगीमा के परिवर्तन भयो ? यसको हिसाब जनताले राखेका छन् । यस पटक मत बदलिनेछ ।’
