स्थानीय जनता नेतृत्वमा नपुग्नु नै काँठक्षेत्रको दुर्भाग्य


२७ कार्तिक २०७९, आईतवार
14 Shares
jagga 5

काठमाडौँ । काठमाडौँ निर्वाचन क्षेत्र नं ६ अन्तर्गत उत्तरतर्फको झोर र साङ्ला क्षेत्रका जनता प्रभावशाली नेतृत्व नपाउँदा राणाकालमै लरी चलेको काँठक्षेत्र आजसम्म पनि उपेक्षित हुन पुगेको गुनासो गर्छन् । यस पटकको संसदीय निर्वाचनमा काँठ क्षेत्रलाई साँच्चीकै माया गर्ने जनप्रतिनिधि छनोट गर्ने पक्षमा आफूहरुबीच कुराकानी भइरहेको जानकारी दिँदै उत्सुकताका साथ मंसिर ४ गतेको निर्वाचन पर्खिरहेको उनीहरु बताउँछन् ।

राणा शासकले यस क्षेत्रबाट घाँस र पानी ढुवानीका लागि बालाजु हुँदै शिवपुरी पहाडको फेदीसम्म ल्याएको बाटो संरक्षणको अभावमा अहिले मासिएको उल्लेख गर्दै काँठवासीले पञ्चायत ढाली ल्याइएको बहुदलीय व्यवस्था र गणतन्त्रमा समेत आफूहरू उपेक्षित हुनु परेकामा दुःख व्यक्त गरेका हुन् । विकास निर्माणका दृष्टिले पछाडि परेको उपत्यकाकै केन्द्रीय भाग रत्नपार्कबाट उत्तर करिब १५ किलोमिटर दूरीमा अवस्थित यो निर्वाचन क्षेत्रअन्तर्गतबको झोर र साङ्लासहित आसपासको क्षेत्रलाई काँठ क्षेत्रका रूपमा लिइन्छ ।

salt trading.gif.pagespeed.ce .ZcRuUKaeUT

राजनीतिक पार्टीका नेताबाट हरेक निर्वाचनअघि विकास निर्माणसहित काँठ क्षेत्रका जनताको जीवनस्तर सुधार गर्ने आश्वासन प्राप्त हुने गरेको स्मरण गर्दै अहिलेसम्म ठगिएपनि सचेत काँठका जनता अब कोही कसैको भुलभुलैयामा नपर्ने बताउँछन् । यसअघिका निर्वाचनमा जस्तै मंसिर ४ गतेसम्म आश्वासन बाँड्ने क्रम सुरु भएको जानकारी दिँदै अब व्यक्ति, पार्टी एवं विचारभन्दा पनि माथि उठेर काँठ क्षेत्रलाई माया गर्ने उम्मेदवारका पक्षमा मतदान गर्ने उनीहरुको योजना छ ।

काँठ क्षेत्रमा जन्मे हुर्केका व्यक्ति अहिलेसम्म पार्टी नेतृत्व र संसद्मा पुग्न नसक्नु नै यस भेगको दुर्भाग्य भएको उल्लेख गर्दै टोखा नगरपालिका वडा नं १ झोर निवासी बृद्ध सुशील अधिकारी भन्छिन्, ‘जहिले पनि सहरका टाठाबाठाले टिकट पाउँछन्, चुनाव तिनैले जित्छन्, आफूअनुकुल बजेट खेलाउँछन् र काँठ क्षेत्रलाई बिर्सन्छन् । भोट हाल्दाहाल्दै हामी नै लौरो टेक्ने अवस्थामा आइपुग्यौंँ, अब त अति भयो, यस पटकको निर्वाचनमा काँठ क्षेत्रलाई माया गर्ने उम्मेदवारलाई भोट हाल्ने गरी सल्लाह गरिरहेका छौंँ ।’

jagdamba.cement

देश र जनताको भाग्यको फैसला गर्ने ऐतिहासिक संसदीय निर्वाचनमा काँठबासीले यसअघि जस्तै उत्साहका साथ भाग लिने विश्वास व्यक्त गर्दै झोर निवासी अर्का बृद्ध तथा अवकाशप्राप्त राष्ट्रसेवक कर्मचारी नारायणबहादुर खत्री भन्छन्, ‘गुणस्तरीय शिक्षा, स्वास्थ्य सेवा, ठूला उद्योग–कलकारखाना र कालोपत्रसहितको चौडा सडक नभएसम्म काँठ क्षेत्रको वास्तविक विकास असम्भव छ । सामाजिक, सांस्कृतिक तथा आर्थिक दृष्टिले करिब उस्तै परिस्थिति रहेको समग्र काँठ क्षेत्रको विकास र समृद्धिका पक्षमा मतदान गर्न काँठबासी सबैमा अनुरोध गर्दछु ।’

हामीले भोट हालेका पार्टीका नेताहरू पटक–पटक मन्त्री भए पनि काँठ क्षेत्रले कहिल्यै केही नपाएको गुनासो गर्दै अर्का बृद्ध मोहन लामिछाने यस पटकको संसदीय निर्वाचनमा स्वतन्त्र उम्मेदवारका पक्षमा मतदान गर्ने कि भनी टोल, छिमेकमा कुराकानी भइरहेको बताउँछन् ।

झोर निवासी भूतपूर्व सैनिक गोविन्द अधिकारी प्रतिनिधिसभा र प्रदेशसभाको निर्वाचनको मिति नजिकिए पनि सडकमा माइकिङ गरी हिँड्ने बाहेक जनताको घरदैलोमा उम्मेदवार अझैसम्म नआएकोे, स्थानीय पार्टीका नेता तथा कार्यकर्ताको उत्साहमा कमी देखिएको, चोक तथा दोबाटोमा भेला भई झैझगडा एवं भनाभन गर्नेक्रम न्यून रहेको, निर्वाचनको माहोल सिर्जना नभएको जस्तो देखिएको र निर्वाचन प्रचारप्रसारका क्रममा यसअघिका जस्तो तडकभडक नदेखिएकामा आश्चर्य प्रकट गर्छन् ।

सोही क्षेत्रअन्तर्गतकोे तारकेश्वर नगरपालिका–१ साङ्ला निवासी श्यामकृष्ण कुँवर राजनीतिक पार्टी र तिनका नेताहरूलाई साथ दिँदैै आएको उपत्यकाको काँठक्षेत्र सदैव उपेक्षित हुनुपरेकामा दुःख व्यक्त गर्दै अब आवेगमा नभइ विवेकका आधारमा मतदान गरी काँठप्रेमी जनप्रतिनिधि छान्ने तयारी भइरहेको बताउँछन् ।

साङ्लाकी विष्णुमाया तामाङ भन्छिन्, ‘गाउँटोलमा निर्वाचनको हल्लीखल्ली भए पनि त्यसतर्फ लाग्ने फूर्सद छैन, काम नगरे खान पाइँदैन, तर मंसिर ४ गतेका दिन भने सबैथोक छोडी मन परेको उम्मेदवारलाई भोट हाल्ने नै हो ।’ पिीछडिएका झोर तथा साङ्ला र आसपासका क्षेत्रमा रहेका अव्यवस्थित सडक तथा बाटोघाटो व्यवस्थित गर्न र शुद्ध पानी आपूर्ति गर्न प्रतिबद्धता व्यक्त गर्ने उम्मेदवारलाई मतदान गर्न विषयमा छलफल भइरहेको त्यहाँका बासिन्दा बताउँछन् ।

त्यस्तै कृषि, मलखाद, बिउबीजन, विषादी र प्राविधिकको व्यवस्था गर्न, कृषि तथा दुग्धजन्य उत्पादनको बिक्री कक्ष निर्माण गर्न, बेरोजगार स्थानीय युवालाई सीपमूलक तालिमको व्यवस्थासहित रोजगार बनाउन , कुलतमा फसेका युवाको जीवन सुधार गरी भविष्य सुनिश्चित गर्न, प्राविधिक तथा व्यावसायिक शिक्षालय स्थापना गर्न, ठूला लगानीका उद्योग सञ्चालनका लागि लगानी आकर्षित गरी रोजगारी सिर्जना गर्न र गाउँमै पेसा व्यवसायमा गरी खान पाउने व्यवस्था गर्नसक्ने उम्मेदवारलाई मतदान गर्ने पक्षमा काँठबासी रहेको देखिन्छ । उक्त निर्वाचन क्षेत्रमा बामलोकतान्त्रिक गठबन्धनका तर्फबाट पूर्वमन्त्री भीमसेनदास श्रेष्ठ, नेकपा एमालेको तर्फबाट पूर्व प्रहरी प्रमुख सर्वेन्द्र खनाल, राष्ट्रिय स्वतन्त्र पार्टीबाट शिशिर खनालसहित २४ जना प्रतिनिधिसभा सदस्यका लागि प्रतिस्पर्धामा छन् ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७