इङल्याण्डसँगको एक दिवसीय श्रृङ्खला अष्ट्रेलियाले जित्यो
काठमाडौं । इङल्याण्डसँगको एक दिवसीय क्रिकेट श्रृङ्खला अष्ट्रेलियाले जितेको छ । सिड्नीमा आज भएको दोस्रो खेल ७२ रनले जितेसँगै अष्ट्रेलियाले तीन खेलको श्रृङ्खला एक खेल बाँकी छँदै जितेको हो ।
आज अष्ट्रेलियाले दिएको २८१ रनको लक्ष्य पछ्याएको इङल्याण्ड ३८ ओभर ५ बलमा २०८ रन बनाउँदा अलआउट भयो । इङल्याण्डका साम विलिङले ७१ र जेम्स भिन्सले ७१ रन बनाए । बलिङतर्फ अष्ट्रेलियाका मिचेल स्टार्क र एडम जाम्पाले ४÷४ तथा जोस हजलउडले २ विकेट लिए ।
यसअघि टस जितेर पहिले ब्याटिङ गरेको अष्ट्रेलियाले ८ विकेट गुमाएर २८० रन बनायो । उसका लागि स्टेभिन स्मिथले ९४, मार्नुस लाबुसेनले ५८ र मिचेल मार्सले ५० रन बनाए । बलिङतर्फ इङल्याण्डका अदिल रसिदले ३ तथा क्रिस वोक्स र डेविड विलीले २÷२ विकेट लिए ।
